Shkëndija zyrtarizon afrimin e Sebastijan Spahiut

Shkëndija e Tetovës ka prezantuar sot përforcimin e radhës. Bëhet fjalë për mesfushorin 25-vjeçar Sebastijan Spahiu, i cili pritet të sjellë përvojë dhe cilësi në repartin e mesfushës kuqezi, njofton Telegrafi.

Spahiu është i njohur për tifozët shqiptarë, pasi u afirmua te Laçi dhe më pas kaloi te Egnatia, me të cilën fitoi titullin kampion në Superligën shqiptare. Sezonin e kaluar ai luajti në kampionatin iranian me Mes Rafsanjan, por nuk pati vazhdimësi.

Në futbollin shqiptar, Spahiu ka grumbulluar 79 paraqitje, duke shënuar 6 gola dhe dhuruar 13 asistime. Ai mban dy shtetësi, shqiptare dhe belge, ndërsa hapat e parë i hodhi në Belgjikë me Mouscron.

Me këtë afrim, Shkëndija synon të forcojë skuadrën për sfidat që e presin në kampionat dhe në fazën e grupeve të Ligës së Konferencës.