Tajfuni Katziki kërcënon Vietnamin, mbi 325,000 banorë evakuohen nga shtëpitë e tyre

Tajfuni Katziki kërcënon Vietnamin, mbi 325,000 banorë evakuohen nga shtëpitë e tyre

Qindra mijëra njerëz po evakuohen nga zonat bregdetare të Vietnamit ndërsa tajfuni Katsiki i afrohet vendit me erëra që arrijnë deri në 160 kilometra në orë.

Katsiki, tajfuni i pestë që godet Vietnamin këtë vit, ndodhet aktualisht në det, në Gjirin e Tonkinit, ku ka shkaktuar dallgë deri në 9.5 metra të larta.

Sipas Qendrës Kombëtare të Parashikimit Hidrometeorologjik të Vietnamit, tajfuni pritet të arrijë në tokë rreth orës 13:00 (ora lokale; 9:00 ET), me erëra deri në 157 km/h.

Rreth 325,000 banorë në pesë provinca bregdetare pritet të evakuohen dhe të strehohen përkohësisht në shkolla dhe ndërtesa publike, njoftuan autoritetet.

Qendra e qytetit Vinh, një qytet bregdetar në pjesën qendrore të vendit, u përmbyt gjatë natës. Në mëngjes, rrugët ishin thuajse të zbrazëta, ndërsa shumica e dyqaneve dhe restoranteve kishin mbyllur dyert. Shumë banorë dhe tregtarë kishin vendosur thasë me rërë për të mbrojtur shtëpitë dhe bizneset e tyre.

Deri në agim, rreth 30,000 persona ishin evakuuar, dy aeroporte kombëtare ishin mbyllur dhe të gjitha anijet e peshkimit në rrugën e stuhisë u urdhëruan të ktheheshin në port.

Megjithatë, pritet që tajfuni të humbasë një pjesë të konsiderueshme të fuqisë së tij sapo të zbresë në tokë.

Më shumë se një duzinë fluturimesh vendase u anuluan dje. Në ishullin Hainan të Kinës, autoritetet evakuuan rreth 20,000 banorë, ndërsa tajfuni kalonte përgjatë bregdetit jugor të tij.

Në Vietnam, mbi 100 persona janë raportuar të vdekur ose të zhdukur për shkak të fatkeqësive natyrore gjatë shtatë muajve të parë të vitit 2025, sipas të dhënave të Ministrisë së Bujqësisë. Dëmi ekonomik vlerësohet të ketë tejkaluar 21 milionë dollarë.

Në shtator të vitit 2023, Vietnami pësoi humbje prej 3.3 miliardë dollarësh kur tajfuni i fuqishëm Yagi goditi vendin, duke shkaktuar dëme të mëdha në veri dhe duke lënë qindra viktima pas vetes.