Zëvendëskryeministri Arben Fetai: Makineria e BDI-së po më sulmon me profile të rreme, por karvani ynë ecën përpara

Zëvendëskryeministri Arben Fetai ka reaguar ashpër ndaj një vale sulmesh në rrjetet sociale, për të cilat ai akuzon makinerinë propagandistike të BDI-së dhe aleatëve të saj.

Në një deklaratë publike, Fetai ka theksuar se nuk do të ndalet përballë shpifjeve dhe gënjeshtrave, duke i quajtur ato një dëshmi e frikës së kundërshtarëve politikë.

“Makineria propagandistike e BDI-së dhe e patericave të saj ka nisur një fushatë të egër kundër personalitetit tim,” shprehet Fetai, duke shtuar se sulmet po bëhen përmes profileve të rreme që synojnë ta njollosin me “lloj-lloj shpifjesh dhe gënjeshtrash”.

Sipas tij, këto sulme të ulëta nuk bëjnë gjë tjetër veçse e forcojnë edhe më shumë vendosmërinë për të vazhduar misionin politik:

“Këto sulme janë një shenjë e fuqisë sonë. Ata sulmojnë sepse lëvizja jonë i ka prishur planet e BDI-së dhe të pengjeve të Gjoka Konstruksion.”

“Duart e mia janë të pastra, ndërgjegjja ime e qetë”

Në deklaratën e tij, Fetai ndalet te tre parime që, sipas tij, përfaqësojnë krenarinë e tij në politikë:

Integriteti financiar – “Për 20 vjet karrierë, unë nuk kam keqpërdorur as edhe një qindarkë të burimeve publike. Duart e mia janë të pastra, ndërgjegjja ime e qetë.”

Distanca nga BDI-ja – “Jam i vetmi që kurrë nuk ka pasur kontakt, bashkëpunim apo kompromis me BDI-në dhe me kryetarin e tyre. Kam mbajtur dhe do mbaj një distancë higjienike me ta.”

Pavarësia vendimmarrëse – “Askush nuk mund të ndikojë vendimet e mia, të më kushtëzojë apo të më shantazhojë. Varësia ime e vetme është ndaj popullit tonë dhe kombit tonë.”

Fetai e mbyll reagimin e tij me një mesazh sfidues ndaj kundërshtarëve:

“Sulmet e tyre vijnë nga profilet e rreme, sepse askush nuk mund të më përballë me emër dhe mbiemër me akuza reale. Le të lehin zagarët. Karavani ynë ecën përpara, i pandalshëm, drejt një të ardhmeje ku shqiptarët fuqizohen, jo eksploatohen.”