Bombardimet e Izraelit në Katar, Emiratet e Bashkuara Arabe dënojnë aktin: Sulm i pabesë

Emiratet e Bashkuara Arabe kanë reaguar pas sulmit të ditës së sotme të Izraelit në kryeqytetin Doha të Katarit.

Sipas mediave të huaja, një këshilltar diplomatik i Presidentit të vendit tha se ata “qëndrojnë me Katarin”, duke e përshkruar sulmin e Izraelit në Doha si “të pabesë”.

Ditën e sotme u dëgjuan shpërthime dhe është parë tym që ngrihet mbi kryeqytetin e Katarit, Doha, raporton agjencia e lajmeve AFP dhe Reuters.

Ndërkohë përsmes një deklarate, ushtria izraelite ka konfirmuar sulmet, duke thënë se ka kryer një “sulm të saktë” të synuar ndaj udhëheqësve të lartë të Hamasit.

“Para sulmit, u morën masa për të zbutur dëmin ndaj civilëve, duke përfshirë përdorimin e municioneve të sakta dhe inteligjencës shtesë”, thuhej më tej në deklaratë.

Ndërkohë një zyrtar izraelit konfirmon se sulmi në Katar kishte në shënjestër udhëheqësit e lartë të Hamasit.

Po ashtu, një zyrtar i Hamasit i tha BBC-së se delegacioni negociues i Hamasit u shënjestrua gjatë takimit të tij në Doha.