Erdogan bën thirrje për sanksione ndaj Izraelit: Netanyahu synon të fusë Lindjen e Mesme në kaos

Presidenti turk Recep Tayyip Erdogan akuzoi Izraelin për gjenocid gjatë një fjalimi në samitin e jashtëzakonshëm arabo-islamik në Doha të Katarit, ndërsa pretendoi se kryeministri izraelit, Benjamin Netanyahu, synon ta “zhytë rajonin në kaos”.

Në të njëjtën kohë, presidenti turk foli për një “mentalitet lakmitar dhe të etur për gjak midis zyrtarëve izraelitë” dhe bëri thirrje për sanksione ndaj Izraelit.

“Shpreh ngushëllimet e mia për vëllezërit e mi nga Palestina dhe Katari që ranë viktima të gjenocidit të Izraelit. Ne organizuam samite emergjente për shkak të gjenocidit të kryer nga Izraeli”, tha fillimisht presidenti turk.

“Agresioni në rritje izraelit përbën një kërcënim të drejtpërdrejtë për rajonin tonë”, shtoi ai, sipas Al Jazeera, dhe vuri në dukje se “shpresoj që vendimet tona sot të përkthehen në një deklaratë me shkrim që do t’i drejtohet të gjithë botës”.

“Është bërë e qartë se qeveria Netanyahu synon të vazhdojë masakrat kundër popullit palestinez dhe ta zhytë rajonin në kaos. Po përballemi me një mentalitet terrorist. Ky mentalitet mbijeton falë pandëshkueshmërisë së krimeve që kryen”, shtoi ai.

Rexhep Tajip Erdogan, sipas CNN Turk, argumentoi se “Izraeli me këtë gjenocid duhet të ndalet” dhe deklaroi se “Izraeli nuk do të ndalet pa sanksione”.

“Deklarata nga disa vende se kanë ndërmend të njohin një shtet palestinez është një hap pozitiv. Megjithatë, këto hapa do të kenë vështirësi të japin fryte nëse nuk mbështeten nga sanksione specifike kundër Izraelit”, shtoi ai.

Presidenti turk theksoi se duhet të ushtrohet presion ekonomik ndaj Izraelit. “Ne kemi ndërprerë të gjitha marrëdhëniet tregtare me Izraelin për një vit e gjysmë. Përvoja e kaluar ka vërtetuar suksesin e një presioni të tillë”, shtoi ai.

“Politikanët izraelitë po përsërisin iluzionet rreth të ashtuquajturit Izrael i Madh. Ne duhet të luftojmë për t’i sjellë zyrtarët izraelitë para drejtësisë në përputhje me mekanizmat ligjorë ndërkombëtarë”, tha gjithashtu presidenti turk.

Ai tha gjithashtu se bota arabo-islamike “duhet të arrijë një nivel autonomie në fusha të caktuara. Unë besoj se ne duhet të intensifikojmë bashkëpunimin tonë në këto fusha për të fituar në 10 vitet e ardhshme”.

“Duhet të zhvillohen mekanizmat e bashkëpunimit të përbashkët midis vendeve islamike. Ne nuk mund ta pranojmë zhvendosjen e popullit palestinez, gjenocidin e tyre apo ndarjen e tyre”, shtoi ai.