Erdogan mbyll internetin dhe godet opozitën në Stamboll: Turqia zhytet në censurë dhe represion

Qeveria turke ka vendosur një bllokim të plotë të internetit për 12 orë, duke shkelur rëndë lirinë e fjalës dhe të drejtën e informimit të qytetarëve. Pas përplasjeve të dhunshme midis policisë dhe mbështetësve të Partisë Republikane Popullore (CHP) në Stamboll, autoritetet kufizuan aksesin në YouTube, X, Instagram dhe WhatsApp në të gjithë vendin.

Policia përdori sprej me piper për të shpërndarë protestuesit që mbronin selinë e CHP-së nga marrja e saj me forcë nga një administrator i emëruar nga qeveria, Gürsel Tekin, i cili synon të zëvendësojë kryetarin legjitim të zgjedhur, Özgür Çelik.

Ndërkohë që qytetarët iu drejtuan VPN-ve për të anashkaluar censurën, Autoriteti i Teknologjive të Informacionit dhe Komunikimit (BTK) nuk ka dhënë asnjë njoftim zyrtar, duke e bërë bllokimin edhe më të errët dhe arbitrar.

Kjo lëvizje e qeverisë vjen pas arrestimit politik të kryetarit të Bashkisë së Stambollit, Ekrem İmamoğlu, i cili u burgos në mars, si dhe pas një vale arrestimesh ndaj figurave të opozitës. Kritikët e shohin këtë si një ofensivë të orkestruar nga Presidenti Erdogan për të shkatërruar partinë më të madhe opozitare dhe për të kontrolluar çdo hap të saj.

Në shtator pritet të zhvillohet edhe gjyqi për rikthimin e ish-kreut të CHP-së, Kemal Kılıçdaroğlu, një manovër që sipas analistëve mund të jetë e mbështetur nga qeveria për të përçarë opozitën dhe për të dobësuar liderin aktual, Özgür Özel.

Turqia po përballet me një nga sulmet më të ashpra ndaj demokracisë dhe lirive themelore, duke treguar qartë fytyrën autoritare të regjimit të Erdoganit.