Netanyahu akuzon Egjiptin: Po mbajnë të burgosur banorët e Gazës që duan të largohen nga zona e luftës

Tensionet mes Izraelit dhe Egjiptit janë rritur ndjeshëm, pasi kryeministri izraelit Benjamin Netanjahu akuzoi Egjiptin se po mban “të burgosur” banorët palestinezë të Gazës që kërkojnë të largohen nga zona e luftës. Kairo reagoi ashpër, duke e quajtur deklaratën “të papranueshme” dhe një përpjekje për të përshkallëzuar krizën në rajon.

Ministri i Jashtëm egjiptian, Badr Abdelatty, deklaroi se Egjipti dënon me forcë komentet e Netanjahut, të cilat sipas tij synojnë “të zgjatin konfliktin dhe të forcojnë paqëndrueshmërinë në Lindjen e Mesme”.

“Dëbimi i palestinezëve nga tokat e tyre përbën një vijë të kuqe për Egjiptin dhe kjo nuk do të lejohet kurrë. Dëbimi do të thotë shfarosje dhe fund i çështjes palestineze”, u shpreh Abdelatty gjatë një deklarate për mediat nga Lefkosia e Qipros.

Egjipti ka qenë ndër ndërmjetësit kryesorë në përpjekjet për arritjen e një armëpushimi mes Izraelit dhe Hamasit, së bashku me SHBA-në dhe Katarin, por tensionet po rriten gjithnjë e më shumë.

Abdelatty ripërsëriti gjithashtu akuzat për gjenocid nga ana e Izraelit në Rripin e Gazës, një pretendim që Tel Avivi e mohon kategorikisht.