Presidenti Milanoviq: Kroacia duhet ta njohë Palestinën

Presidenti i Kroacisë, Zoran Milanoviq, ka deklaruar se njohja e Palestinës është e drejtë dhe se Kroacia duhet ta ndërmarrë këtë hap pa vonesë.

“Palestina duhet të njihet dhe Kroacia duhet ta bëjë këtë. Unë do ta mbështes. Ky nuk është shpërblim, por një e drejtë e tyre,” tha Milanoviq.

Ai gjithashtu theksoi se ish-presidenti amerikan Donald Trump, sipas tij, do të jetë kundër njohjes së Palestinës, duke shtuar se nuk e kupton pse Shtetet e Bashkuara vazhdojnë ta mbështesin “regjimin sionist” në këtë mënyrë.

“Deri në vitin 1991, mund ta kuptoja – për shkak të Luftës së Ftohtë. Por gjithçka që ndodhi më pas ishte në dëm të vetë Shteteve të Bashkuara. Kjo nuk u sjell atyre asnjë përfitim, sidomos në aspektin e sigurisë,” tha presidenti kroat.

Milanoviq ka qenë i hapur edhe në kritikat ndaj Izraelit, duke i quajtur veprimet e tij në Rripin e Gazës “krime lufte të qëllimshme dhe sistematike”, për të cilat, sipas tij, drejtuesit e Izraelit mbajnë përgjegjësi të plotë.

Ai bëri thirrje që Qeveria kroate të nisë procedurat në Kuvend për njohjen e shtetit të Palestinës, duke e cilësuar këtë si një hap të domosdoshëm në respektim të të drejtave ndërkombëtare.