Realit i ‘mbushet kupa’ me lojtarin e tij, do të dëgjojë oferta për të

Real Madrid po kalon një moment vendimtar në planifikimin sportiv për merkaton dimërore të transferimeve. Një nga emrat që po gjeneron më shumë debat brenda bordit të klubit është ai i Endrick, xhevahiri i ri brazilian që mbërriti në “Santiago Bernabéu” me etiketën e një ylli të së ardhmes, por deri tani nuk ka arritur të përmbushë pritshmëritë që e shoqëronin.

Sulmuesi, i cili u afrua si një bast për të tashmen dhe mbi të gjitha për të ardhmen, nuk ka mundur të përshtatet plotësisht me ritmet e kërkuara të skuadrës së “Los Blancos”. Edhe pse po merr minuta, adaptimi i tij në futbollin europian po rezulton më i vështirë se sa pritej. Presioni, ritmi kompetitiv dhe kërkesat e klubit e kanë penguar që të shfaqë gjithë potencialin e tij.

Merkatoja e janarit shfaqet si një mundësi “shpëtimi” për brazilianin. Klubi po shqyrton mundësinë e një huazimi, që do t’i lejonte atij të fitonte eksperiencë diku tjetër, me më pak presion dhe më shumë hapësirë loje. Synimi është që të garantohet progresi i tij dhe të shmanget stanjacioni në këtë fazë delikate të karrierës.

Disa klube të La Ligas kanë shfaqur interes për ta marrë në skuadër Endrickun. Midis tyre spikat Sevilla FC, që ka nevojë për të forcuar sulmin pas një starti të dobët sezoni; Valencia CF, që kërkon alternativa të reja për të konsoliduar më tej projektin e trajnerit Baraja; Celta Vigo, ku stili ofensiv mund të favorizojë zhvillimin e tij; dhe madje edhe Real Oviedo, që ëndërron t’i japë një rol lideri në Segunda División.

Në Bernabéu, mundësia që Endrick të marrë minuta në një ambient tjetër kompetitiv shihet pozitivisht, për sa kohë garanton rikthimin e tij më të pjekur dhe më të përgatitur për të triumfuar. Largimi i tij nuk do të ishte i përhershëm, por një lëvizje strategjike që mund të përcaktojë të ardhmen e tij të afërt.

Durimi ka kufijtë e vet në një klub si Real Madrid. Pavarësisht cilësisë së padiskutueshme të brazilianit, drejtuesit janë të vetëdijshëm se presioni i rezultateve nuk lejon pritje të pafundme. Një huazim i menaxhuar mirë mund të jetë çelësi që Endrick të rifitojë besimin, të marrë eksperiencë dhe të rikthehet në Chamartín i gatshëm për të konkurruar në nivelin më të lartë.

Muajt e ardhshëm do të jenë vendimtarë. Janari mund të nënkuptojë një fillim të ri për Endrickun, larg Bernabéut, por gjithmonë me synimin për të veshur sërish fanellën e bardhë si ai lojtar i veçantë që tifozët ëndërrojnë të shohin.