Stuhia detyron anijet me ndihma për Gazën të kthehen në portin e Barcelonës

Një flotilje ndihmash me destinacion Gazën është detyruar të kthehet në breg, vetëm disa orë pasi u nis nga Barcelona.

Karvani i parë i Flotiljes Globale Sumud, i cili do të përfshijë dhjetëra anije dhe pjesëmarrës nga 44 vende, u kthye në port pasi u përball me erëra të forta gjatë natës.

Rreth 20 anije ishin nisur fillimisht nga Barcelona, me mijëra mbështetës pro-palestinezë që u mblodhën në portet e qytetit për t’i përshëndetur.

Atyre do t’u bashkoheshin anije të tjera nga portet mesdhetare, përfshirë Tunizinë, në ditët në vijim, shkruan euronews.

Organizatorët thanë se vendimi për t’u kthyer në Spanjë ishte marrë për “siguri”, duke shtuar se disa nga anijet më të vogla mund të kishin qenë në rrezik në kushtet e pafavorshme të motit.

Pjesëmarrësit në bordin e flotiljes, e cila e ka quajtur veten si më e madhja që përpiqet të thyejë bllokadën detare izraelite të territorit palestinez, përfshijnë aktivisten suedeze të klimës Greta Thunberg dhe Ada Colau, ish-kryetaren e bashkisë së Barcelonës.

Ajo ka marrë gjithashtu mbështetje nga aktorja fituese e çmimit Oscar, Susan Sarandon, dhe aktori i Game of Thrones, Liam Cunningham.

Mes paralajmërimeve të motit për reshje shiu dhe stuhi të forta në Spanjë, mbetet e paqartë se kur konvoji detar do të jetë në gjendje të niset përsëri nga Barcelona.

Ndryshe, ushtria izraelite ka të ngjarë të përpiqet të ndalojë anijet që të afrohen pranë Gazës, siç ka bërë në të kaluarën.

Përpjekja e parë e flotiljes për t’u nisur për në Gaza vjen pasi ekspertët e ushqimit paralajmëruan muajin e kaluar se territori ishte në prag të urisë, me gjysmë milioni njerëz në të gjithë enklavën që përballen me nivele katastrofike të urisë.

Ministria e shëndetësisë e Gazës tha se 340 palestinezë në Gaza, përfshirë 124 fëmijë, kanë vdekur nga kequshqyerja deri më tani.

Në total, më shumë se 63,000 palestinezë janë vrarë në Gaza në luftën pothuajse 23-mujore.