Trump thotë se 11 persona u vranë në sulmin e SHBA-së ndaj një varke me drogë që vinte nga Venezuela

Presidenti Donald Trump ka thënë se SHBA ka kryer një sulm ndaj një anijeje që mbante drogë në Karaibet jugore, duke vrarë 11 “narkoterroristë”.

Ai ka postuar në rrjetet sociale se operacioni ushtarak i SHBA-së të martën kishte shënjestruar anëtarët e bandës venezueliane Tren de Aragua.

Trump tha se anija ndodhej në ujërat ndërkombëtare dhe po transportonte lëndë narkotike të paligjshme që kishin për destinacion SHBA-në.

Administrata e Trumpit ka rritur presionin ushtarak dhe politik ndaj presidentit venezuelian Nicolas Maduro javët e fundit, duke përfshirë një shpërblim prej 50 milionë dollarësh (37 milionë £) për informacion që çon në arrestimin e tij për akuza të trafikut të drogës. Maduro ka premtuar se Venezuela do të luftojë çdo përpjekje të mundshme të ndërhyrjes ushtarake amerikane.

Duke folur para gazetarëve në Zyrën Ovale të martën, Trump tha se forcat amerikane kishin “qëlluar” një “anije që mbante drogë” në afërsi të Venezuelës, njofton BBC, transmeton Sinjali.

“Shumë drogë në atë anije,” tha ai.

Trump shtoi se ishte informuar për incidentin nga Kryetari i Shefave të Shtabit, Gjenerali Dan Caine.

Më vonë presidenti postoi në platformën e tij Truth Social: “Më herët këtë mëngjes, me urdhërin tim, Forcat Ushtarake të SHBA-së kanë kryer një sulm kinetik kundër narkoterroristëve të identifikuar pozitivisht të Tren de Aragua në zonën e përgjegjësisë së SOUTHCOM-it.”

Ai shtoi: “Sulmi rezultoi me 11 terroristë të vrarë në aksion. Asnjë forcë amerikane nuk u lëndua në këtë sulm. Ju lutem le ta shërbejë kjo si paralajmërim për këdo që mendon të sjellë drogë në Shtetet e Bashkuara të Amerikës. KUJDES!”

Postimi i tij u shoqërua me një video ajrore me cilësi të dobët që tregonte një barkë motorike duke lëvizur me shpejtësi mbi ujëra të trazuara përpara se të shpërthente në flakë.

Në një postim në rrjetet sociale, Ministri i Komunikimeve i Venezuelës, Freddy Nanez, sugjeroi, pa prova, se videoja e ndarë nga Trump ishte krijuar me inteligjencë artificiale.

Sekretari i Shtetit Marco Rubio tha në një postim në X se “sot ushtria amerikane kreu një sulm vdekjeprurës në Karaibet jugore ndaj një anijeje me drogë e cila kishte nisur nga Venezuela dhe po operohej nga një organizatë e shpallur si narkoterroriste”.

Ende nuk është e qartë se çfarë lloj drogash besohej se mbante anija.