VMRO-DPMNE: LSDM po bën mashtrim me kërkesën për deklasifikimin e dokumenteve për përgjimet, sepse dëshiron të shpëtojë organizatorët

Partia në pushtet, VMRO-DPMNE, akuzoi se LSDM po bën bllof me kërkesën për deklasifikimin e dokumenteve lidhur me pretendimet për përgjimin e paligjshëm, sepse, siç thonë ata, me vetëdije po kërkon diçka që është e pamundur të bëhet. Ata theksojnë se deklasifikimi i dokumenteve bëhet vetëm sipas ligjit, në procedurë gjyqësore dhe me kërkesë e vendim të organeve kompetente, e jo me porosi partiake.

„Duke pasur parasysh se për të gjitha informacionet e lidhura me veprimtarinë e paligjshme në ASK është njoftuar tashmë Prokuroria Publike, veprimet e mëtejshme mbeten në kompetencën e tyre. Çështja e deklasifikimit të dokumenteve mund të jetë pjesë vetëm e procedurave që zhvillohen nga prokuroria dhe gjykata, e jo nga porositë partiake të LSDM-së. Me këtë qasje, LSDM qartë konfirmon se ka frikë. Një qasje e tillë vetëm i forcon dyshimet se ata qëndrojnë pas porosive për ndjekje dhe përgjim, sepse përmes përpjekjeve të rreme për ‘deklasifikim’ duan të shpëtojnë organizatorët, duke i hedhur provat në opinion“, thonë nga VMRO-DPMNE.

Ata shtojnë se për shkak të ndjeshmërisë së temës është e domosdoshme të respektohen procedurat e përcaktuara rreptësisht, ndërsa përcaktimi i përgjegjësisë dhe ndjekja e mundshme penale, siç theksojnë nga partia në pushtet, është në kompetencën e prokurorive dhe gjykatave, e jo të LSDM-së.

Më herët gjatë ditës, lideri i LSDM-së, Venko Filipçe, publikoi se partia kërkon deklasifikim urgjent të gjithë dokumentacionit nga rasti që pushteti e paraqiti si aferë për përgjim.
„Për këtë ka një procedurë të qartë sipas së cilës ASK mund t’i bëjë publike të gjitha informacionet dhe dokumentet. Rasti duhet të jetë i qasshëm për opinionin në mënyrë që të gjykohet nëse dhe kush e ka keqpërdorur funksionin në shërbimet e sigurisë. Nëse ANB nuk e bën këtë, do të jetë e qartë se kjo do të jetë edhe një përpjekje e pasuksesshme për manipulim“, shkroi Filipçe në një postim në Facebook.