Aston Villa e mposht Manchester Cityn në “Villa Park”
Aston Villa e mposht Manchester Cityn në “Villa Park”
Aston Villa u bë vetëm skuadra e dytë në historinë e elitës së futbollit anglez që, pas një fillimi me pesë ndeshje pa fitore, arrin katër fitore radhazi, pasi goli i Matty Cash në pjesën e parë i shkaktoi Manchester City-t humbjen e parë në Premier League (PL) që nga gushti.
Skuadra e City-t, që kishte kaluar në avantazh në 10 ndeshjet e fundit radhazi, u gjend në një situatë të pazakontë kur Cash kaloi Aston Villën në epërsi brenda 20 minutave të para. Një goditje këndi e shkurtër u kombinua deri në kufi të zonës, ku reprezentuesi polak u shmang nga Bernardo Silva dhe goditi me të majtën duke e dërguar topin në rrjetë përtej Gianluigi Donnarummas, i cili mbeti i palëvizur. Erling Haaland, në formë të lartë, dukej gati për ta barazuar menjëherë rezultatin pasi hyri në zonën e Villës, por për habinë e të gjithëve, nuk arriti të mposhtë portierin Emiliano Martínez.
Një dëmtim i Emiliano Buendía hodhi hije mbi paraqitjen e shkëlqyer të vendasve në pjesën e parë, pasi ai u detyrua të largohej herët nga loja, duke i hapur rrugën debutimit në shtëpi në Premier League për Jadon Sancho me fanellën e Villës. Huazimi nga Manchester United u përfshi menjëherë në një aksion që çoi John McGinn në një gjuajtje të devijuar që kaloi paksa jashtë. Për herë të parë këtë sezon, skuadra e Pep Guardiolës ishte në disavantazh në pjesën e parë të një ndeshjeje jashtë fushe, ndaj në pjesën e dytë hyri me më shumë intensitet, me Savinho që detyroi mbrojtjen e Villës të bllokonte dy herë radhazi brenda pak minutash para shënimit të orës së lojës.
Guardiola ndërhyri nga stoli duke futur Nico González, Nico O’Reilly dhe Jérémy Doku për të shtuar presionin ndaj mbrojtjes së Villës, por Sancho tregoi se vendasit nuk kishin ndërmend të mbronin thjesht avantazhin e ngushtë. Ai depërtoi në zonë dhe gjuajti drejt shtyllës së afërt, por Donnarumma ndali dy herë radhazi përpjekjet e tij. Mospërfitimi i Villës nga rastet për të dyfishuar rezultatin pothuajse u dënua, kur Haaland shënoi në kohën shtesë, por për gëzimin e vendasve, flamuri i ngritur i asistentit e anuloi golin dhe vulosi fitoren e tretë radhazi në shtëpi ndaj City-t.
Fitorja e madhe e ngjit Aston Villën në vendin e shtatë, vetëm një pikë larg City-t në vendin e katërt, ndërsa miqtë pësuan humbjen e parë pas nëntë ndeshjeve pa disfatë në të gjitha kompeticionet.