Erdogan: Turqia do t’i bashkohet ‘task-forcës’ për të monitoruar marrëveshjen e Gazës

Presidenti turk Rexhep Tajip Erdogan tha të enjten se Turqia do të marrë pjesë në një “task force” për të mbikëqyrur zbatimin e një marrëveshjeje armëpushimi të arritur midis Izraelit dhe Hamasit.

“Shpresojmë që ne do t’i bashkohemi kësaj task force që do të monitorojë zbatimin e marrëveshjes në terren”.

Turqia, e cila ka qenë e përfshirë ngushtë në negociata, dërgoi një ekip në bisedimet në qytetin turistik egjiptian Sharm El-Sheikh.

Marrëveshja, e cila do të nënshkruhet në Egjipt të enjten, përfshin lirimin e pengjeve të mbetura dhe shihet si një hap i madh drejt përfundimit të luftës dyvjeçare që ka vrarë dhjetëra mijëra njerëz dhe ka shkaktuar një katastrofë humanitare.

“Është me rëndësi të madhe që urgjentisht të ofrohet ndihmë gjithëpërfshirëse humanitare në Gaza, të shkëmbehen pengje dhe të burgosur, si dhe që Izraeli të ndërpresë menjëherë sulmet e tij”.

Ai gjithashtu premtoi se Turqia do të ndihmojë në përpjekjet e rindërtimit në Gaza.