Milani ‘shokohet’ nga Pisa në “San Siro”

Milani u zhgënjye pas barazimit 2-2 ndaj Pisës, në një përballje ku kryesuesit nuk arritën të marrin fitoren ndaj skuadrës së fundit në tabelë — një mbrëmje zhgënjyese për ekipin e Massimiliano Allegrit, por fantastike për djemtë e Gilardinos.

Milani e mbylli pjesën e parë në avantazh 1-0, pasi dominoi shumicën e minutave dhe e kufizoi Pisën në tentativa nga distanca.

Që në fillim, kuqezinjtë morën kontrollin e lojës, duke e shtyrë kundërshtarin në gjysmëfushën e vet. Avantazhi erdhi që në minutën e 7-të, kur Rafael Leão gjeti hapësirë në hyrje të zonës dhe realizoi me një goditje të saktë në cepin e portës – 1-0 për Milanin.

Pas golit, Milani vazhdoi të qarkullonte topin me qetësi përmes Modrić dhe Fofana, duke sulmuar kryesisht nga krahët.

Saelemaekers ishte shumë aktiv, duke dërguar disa krosime të rrezikshme – një prej të cilave mund të kishte sjellë golin e dytë, kur portieri Adrian Semper gaboi në pritje, por Leão reagoi me vonesë.

Pisa pati disa momente të mira: Nzola shërbeu Bonfantin, por ky goditi mbi traversë, ndërsa Akinsanmiro dërgoi topin jashtë nga distanca. Përveç këtyre rasteve, miqtë e patën të vështirë të krijonin presion të qëndrueshëm.

Në fund të pjesës së parë, Milani rifitoi kontrollin, duke testuar sërish Semperin me goditje nga jashtë zonës. Aebischer mori kartonin e parë të verdhë pas një faulli ndaj Leãos për të ndalur një kundërsulm.

Kuqezinjtë shkuan në pushim me epërsi, por vetëm me një gol, duke e lënë ndeshjen të hapur.

Në pjesën e dytë, Milani tentoi ta mbyllte ndeshjen, por Tramoni paralajmëroi me një goditje që kaloi pranë traversës. Në anën tjetër, Bartesaghi krijoi një mundësi të mirë për Santiago Giménez, që gjuajti ngushtë jashtë.

Në minutën e 60-të, pas një kontrolli me VAR për prekje të topit me dorë nga Koni De Winter, arbitri dha penallti, të cilën Juan Cuadrado e shndërroi në gol për 1-1.

Ky barazim e tronditi Milanin, që për disa minuta humbi qetësinë dhe strukturën, duke lejuar Pisën të shtyjë përpara.

Më pas, Milani reagoi. Saelemaekers rrezikoi dy herë, ndërsa Semper bëri një pritje fantastike, dhe pak më vonë Leão goditi shtyllën e sipërme me një goditje të fuqishme.

Allegri futi në lojë Nkunku dhe Athekame për të shtuar freski në sulm, por presioni nuk solli rezultat. Nkunku humbi një rast të artë me kokë në minutën e 80-të.

Pesë minuta para fundit, Nzola shokoi San Siron duke shënuar për 1-2 për Pisën.

Megjithatë, në minutat shtesë, Zachary Athekame realizoi pas një pasimi nga Luka Modrić, duke shpëtuar Milanin nga humbja dhe duke vulosur rezultatin 2-2.

Në fund, Milani humbi dy pikë të vlefshme, pavarësisht dominimit në lojë, ndërsa Pisa mori një pikë të artë falë disiplinës dhe shpirtit luftarak. Për Allegrin, një natë plot zhgënjim dhe raste të humbura.