Netanyahu kërcënon Hamasin

Kryeministri izraelit Benjamin Netanyahu ka konfirmuar vendosmërinë e tij për të kthyer të gjitha eshtrat e pengjeve që janë ende në duart e Hamasit, pas kërcënimeve nga ministri i mbrojtjes për të rifilluar ofensivën në Rripin e Gazës.

Izraeli ka akuzuar lëvizjen islamiste palestineze për shkelje të marrëveshjes së armëpushimit. Marrëveshja kërkonte që lëvizja të dorëzonte të gjithë pengjet në Gaza, të gjallë dhe të vdekur, brenda 72 orëve nga hyrja në fuqi e armëpushimit, ose më së voni deri në orën 9 të mëngjesit të së hënës.

Netanyahu kërcënon Hamasin
Forumi i Familjeve të Pengjeve i bëri thirrje “qeverisë izraelite që të ndërpresë menjëherë zbatimin e të gjitha hapave të mëtejshëm të marrëveshjes, për sa kohë që Hamasi vazhdon të shkelë hapur detyrimet e tij” në lidhje me kthimin e të gjitha mbetjeve mortore.

Hamasi liroi 20 pengje të gjallë në kohë, por deri të hënën kishte dorëzuar eshtrat e vetëm nëntë nga 28 pengjet që mbaheshin.

“Jemi të vendosur të sigurojmë kthimin e të gjithë pengjeve”, tha Netanyahu gjatë një përkujtimi zyrtar të përvjetorit të dytë të sulmit të Hamasit ndaj Izraelit.

“Lufta nuk ka mbaruar ende, por një gjë është e qartë: kushdo që ngre dorë kundër nesh e di se do të paguajë një çmim shumë të lartë”, paralajmëroi ai.

Ministri i Mbrojtjes, Izrael Katz, paralajmëroi të mërkurën se, “nëse Hamasi refuzon të zbatojë marrëveshjen, Izraeli, në koordinim me Shtetet e Bashkuara, do të vazhdojë luftën dhe do të punojë drejt disfatës së plotë” të lëvizjes.

Hamasi kërkon ndihmë për gjetjen e trupave
Po atë ditë, Hamasi tha se kishte dorëzuar mbetjet mortore të pengjeve në Rripin e Gazës që mundi të gjente, duke shtuar se kishte nevojë për “pajisje speciale” për të rikuperuar trupat e mbetur.

I pyetur nëse Hamasi po e respektonte marrëveshjen, Presidenti i SHBA-së Donald Trump tha të mërkurën se Hamasi po “gërmonte” për trupa. “Ata po gërmojnë. Po gjejnë shumë trupa.”

“Disa nga këto trupa kanë qenë atje për një kohë të gjatë, dhe disa janë nën rrënoja. Ata duhet të pastrojnë rrënojat. Disa nga trupat janë në tunele”, shtoi ai.

Të dielën, zëdhënësja e qeverisë izraelite, Shosh Bedrosian, tregoi se një “organ ndërkombëtar”, i dakordësuar si pjesë e marrëveshjes, do të ndihmonte “në gjetjen e pengjeve (të vdekura) nëse ata nuk gjenden dhe lirohen” deri të hënën.

Marrëveshja për armëpushim u arrit në bazë të planit të Donald Trump për një përfundim përfundimtar të luftës në Rripin e Gazës.