Osmani reagon pas deklaratës së Vuçiqit: Turqia po ndihmon në mbrojtjen e paqes, jo në destabilizim

Presidentja e Kosovës, Vjosa Osmani, ka reaguar ashpër ndaj deklaratave të presidentit serb Aleksandar Vuçiq, i cili sulmoi Turqinë, duke e akuzuar se po dëmton stabilitetin në Ballkanin Perëndimor.

Në një postim në rrjetin social X, Osmani doli hapur në mbështetje të presidentit turk Recep Tayyip Erdogan, në të njëjtën ditë kur ish-presidenti amerikan Donald Trump e vlerësoi Turqinë për lidershipin e saj në promovimin e paqes dhe sigurisë globale.

“Vuçiq po e sulmon pa turp Turqinë – një vend që, si shtet anëtar i NATO-s, po ndihmon në mbrojtjen e paqes,” ka shkruar Osmani.

Osmani theksoi se është krenare për bashkëpunimin e ngushtë me Erdoganin, të cilin e përshkroi si “njeri të fjalës, që ka treguar kujdes të sinqertë për popujt e rajonit dhe ka kontribuar në stabilitet e siguri”.

“Ndërkohë, Vuçiq mendon se mund të kërcënojë një vend të madh të NATO-s si Turqia në të njëjtën mënyrë siç kërcënon fqinjët. Në vend që të bashkëpunojë me shtetet e NATO-s, ai zgjedh partneritetin me Rusinë, Kinën dhe Iranin,” shtoi Osmani.

Presidentja tha se Kosova do të vazhdojë forcimin e lidhjeve me aleatët e NATO-s, duke modernizuar aftësitë mbrojtëse sipas standardeve të Aleancës dhe duke kontribuar në sigurinë kolektive.

“Vuçiq duhet të përpiqet të bëjë të njëjtën gjë, në vend që të sulmojë vazhdimisht fqinjët e tij. Por për mendjen e tij hegjemonike, e fiksuar pas të kaluarës, një pjekuri e tillë duket e paarritshme,” theksoi ajo.

Në fund të reagimit, Osmani falënderoi Erdoganin dhe popullin turk për mbështetjen e vazhdueshme ndaj Kosovës:

“Le të zgjasë përgjithmonë lidhja jonë e fortë Kosovë–Turqi.”

Deklaratat e Osmanit erdhën pasi Vuçiq tha se “Turqia nuk e dëshiron stabilitetin në Ballkanin Perëndimor”, duke e akuzuar Ankaranë për armatosjen e Kosovës.