Partitë holandeze ripërqafojnë TikTok-un përpara zgjedhjeve të tetorit

Politikanët në Holandë po rikthehen në aplikacionin TikTok për të arritur votuesit e rinj përpara zgjedhjeve parlamentare të planifikuara për më 29 tetor. Platforma kineze, në pronësi të kompanisë ByteDance, ishte ndaluar më parë nga disa parti për shkak të shqetësimeve të lidhura me sigurinë dhe privatësinë e të dhënave.

Sipas një përmbledhjeje të Euronews, shumica e partive më të mëdha holandeze kanë hapur tashmë llogaritë e tyre në TikTok, ndonëse gjatë zgjedhjeve të nëntorit 2023 ishin pothuajse inekzistente në platformë. Më e spikatura që mungon në këtë rikthim është Partia e Lirisë (PVV) e ekstremit të djathtë të Geert Wilders, e cila megjithatë kryeson sondazhet e fundit të opinionit publik.

Lexo edhe:
Jetëgjatësia në botë: Njerëzit sërish jetojnë më gjatë
Aplikacioni me mbi 200 milionë përdorues në Evropë ka luajtur rol të rëndësishëm në fushata të tjera, si në Rumani, ku ndikimi i mediave sociale dhe dyshimet për përfshirje të aktorëve rusë çuan Komisionin Evropian të nisë një hetim mbi ndërhyrjen e mundshme në zgjedhje.

Një studim i Komisariatit Holandez të Medias tregon se rreth 20% e të rinjve të moshës 18-24 vjeç e përdorin TikTok-un si burimin e tyre kryesor të lajmeve, çka ka shtyrë partitë politike të kërkojnë prani aktive në këtë rrjet. Partia VVD, dikur e udhëhequr nga ish-kryeministri dhe shefi aktual i NATO-s, Mark Rutte, riktheu llogarinë e saj këtë vit, duke theksuar se synon të angazhojë votuesit e rinj përmes platformës.

Ndërkohë, D66 ka bërë të njëjtën lëvizje, pasi u largua më herët për arsye sigurie, por u rikthye për të kundërbalancuar praninë e partive të ekstremit të djathtë. Të dyja partitë theksojnë se përdorin pajisje të veçanta, të quajtura “telefona bosh”, për të shmangur rreziqet e ndarjes së të dhënave.

Debati mbi sigurinë e TikTok-ut mbetet global. Institucionet e BE-së e kanë ndaluar aplikacionin në pajisjet e zyrtarëve, duke ngritur shqetësime për transferimin e të dhënave në Kinë. Autoriteti irlandez i mbrojtjes së të dhënave ka gjetur më herët këtë vit se TikTok ka shkelur Rregulloren e Përgjithshme të Mbrojtjes së të Dhënave (GDPR), ndërsa kompania mohon çdo përfshirje të autoriteteve kineze në marrjen e të dhënave të përdoruesve evropianë.

Në renditjen e partive më të ndjekura në TikTok kryeson BBB, partia e krahut të djathtë të fermerëve, me mbi 115 mijë ndjekës, e ndjekur nga Forumi për Demokraci (FvD) me 91 mijë ndjekës dhe GroenLinks-PvdA me mbi 59 mijë. Por ky popullaritet dixhital nuk përkon domosdoshmërisht me realitetin politik: sondazhet parashikojnë që PVV e Geert Wilders të fitojë zgjedhjet me rreth 30 vende në parlamentin prej 150 vendesh.

Zgjedhjet e 29 tetorit pritet të jenë një test i rëndësishëm për ndikimin e rrjeteve sociale në politikën holandeze dhe në mënyrën si të rinjtë formojnë opinionin e tyre politik në epokën dixhitale.