Skenë si në filma në një ndeshje futbolli: Policia rrethoi fushën dhe i rreshtoi lojtarët, arrestohet shënuesi i shtatë golave

Një skenë e pabesueshme u zhvillua në nivelin e pestë të futbollit finlandez. Sulmuesi brazilian Jonatan Guerreiro, 34 vjeç, u arrestua të dielën nën dyshimin për trukim ndeshjesh, menjëherë pas një ndeshjeje ku ai shënoi shtatë gola.

Sipas raportimeve të ge.globo.com, besohet se Guerreiro ishte i përfshirë në aktivitete të qarqeve të basteve.

Guerreiro u bë objekt i një operacioni ku morën pjesë rreth 20 agjentë të Policisë Kombëtare të Finlandës. Ata hynë me forcë në fushë menjëherë pas fishkëllimës së fundit të ndeshjes midis Finnkurd dhe EsPa/Renat, e cila përfundoi 8-1 në favor të Finnkurd, në qytetin e Espoo-s, pranë Helsinkit.

Sipas mediave lokale, një pjesë e madhe e policëve ishte me rroba civile dhe bllokuan të gjitha daljet nga stadiumi. Lojtarët e Finnkurdit u rreshtuan në fushë për verifikime të identitetit, ndërsa ekipi kundërshtar u lejua të largohej pa ndërprerje.

Shtatë gola dhe sekuestrimi i dokumenteve
Ndeshja, e fundit e sezonit, përfundoi 8-1, me Guerreiro që shënoi shtatë gola. Pesë prej tyre u shënuan në pjesën e dytë, pasi pjesa e parë kishte përfunduar 2-0 për Finnkurd.

Raportimet tregojnë se dy futbollistë të tjerë brazilianë u ndaluan gjithashtu, por u liruan pas kontrollimit të telefonave të tyre celularë.

“Lujta pra” – Ramiz Lladrovci thotë se e mposhti me vota edhe Sami Lushtakun
Zgjedhjet Lokale 2025
“Lujta pra” – Ramiz Lladrovci thotë se e mposhti me vota edhe Sami Lushtakun
Guerreiro u mbajt në paraburgim deri të hënën, ndërsa policia konfiskoi telefonin celular dhe dokumentet personale, përfshirë pasaportën e tij.

Një klub me histori të dyshimtë
Hetimi nuk kufizohet vetëm në këtë ndeshje. Finnkurd, një klub amator që garon në divizionin e pestë të Finlandës dhe u themelua nga komuniteti lokal kurd, ka qenë nën hetim për të paktën tre vjet.

Guerreiro ishte kapiten i ekipit dhe mori detyrën e trajnerit rreth tre javë më parë.

Sulmuesi ka pasur një karrierë modeste në Brazil, ku ka luajtur për klube të vogla pa sukses të dukshëm. Para se t’i bashkohej Finnkurd këtë vit, ai kishte luajtur për Peimari United në Finlandë nga viti 2022 deri në 2023.

Një skemë më e gjerë manipulimi
Sipas raportimeve të mëparshme, Finnkurd ka qenë përdorur nga një grup manipulatorësh brazilianë për të trukuar ndeshje në favor të agjencive të basteve. Skema përfshinte rekrutimin e lojtarëve në Brazil me premtime për paga, akomodim dhe mundësinë për të ndjekur një karrierë në Evropë. Megjithatë, pas mbërritjes në Helsinki, lojtarët do të detyroheshin të merrnin pjesë në manipulim.

Në janar, Komiteti Disiplinor i Shoqatës Finlandeze të Futbollit njoftoi se kishte gjetur prova për manipulim ndeshjesh në disa takime, por nuk kishte arritur të provonte fajësinë e individëve ose klubeve, dhe askush nuk u ndëshkua. Finnkurd ishte një nga klubet nën hetim.

Reagimet e autoriteteve
Drejtori i operacioneve të Federatës Finlandeze të Futbollit, Pekka Soini, konfirmoi arrestimin e shtetasit brazilian, por nuk pranoi të komentojë më tej mbi rastin.

Policia kombëtare gjithashtu nuk ka dhënë detaje shtesë, ndërsa Ambasada e Brazilit në Helsinki njoftoi se nuk ishte informuar zyrtarisht për situatën.