Tentuan të fusnin valixhet me drogë nga Tajlanda, arrestohen në Rinas dy kinezë

Dy shtetas kinezë janë arrestuar në Aeroportin Ndërkombëtar “Nënë Tereza” nga autoritetet shqiptare, pasi tentuan të fusnin në territorin shqiptar një sasi prej rreth 61 kilogramësh lëndë narkotike, e dyshuar si kanabis me përqindje të lartë të substancës aktive THC.

Sipas burimeve zyrtare, lënda narkotike u zbulua në katër valixhe udhëtimi që kishin ardhur me një fluturim nga Tajlanda, me tranzit në Emiratet e Bashkuara Arabe.

Autoritetet shqiptare janë sinjalizuar më herët nga partnerët ndërkombëtarë për këtë ngarkesë, duke mundësuar ndërhyrjen në kohë reale dhe arrestimin e dy shtetasve të huaj.

Ngarkesa është sekuestruar dhe çështja i është referuar strukturave të Antidrogës së Tiranës.

Hetimet vijojnë për të identifikuar destinacionin përfundimtar të drogës, si dhe rrjetin e mundshëm kriminal që fshihet pas këtij rasti të trafikut ndërkombëtar të lëndëve narkotike.