Udhëheqësi i milicisë sudaneze dënohet për krime lufte gjatë luftës në Darfur

Një udhëheqës i milicisë sudaneze është shpallur fajtor për kryerjen e krimeve të luftës dhe krimeve kundër njerëzimit në rajonin e Darfurit më shumë se 20 vjet më parë.

Ali Muhammad Ali Abd-Al-Rahman, i njohur edhe si Ali Kushayb, ishte një nga udhëheqësit e Janjaweed, një grup i mbështetur nga qeveria që terrorizoi Darfurin, duke vrarë qindra mijëra njerëz, ka raportuar BBC, transmeton Gazeta Express.

Kushayb është personi i parë që gjykohet nga Gjykata Ndërkombëtare Penale (GJNP) për mizoritë në Darfur. Ai kishte argumentuar se ishte një rast identiteti i gabuar.

Konflikti zgjati nga viti 2003 deri në vitin 2020 dhe ishte një nga katastrofat më të rënda humanitare në botë, me akuza për spastrim etnik dhe gjenocid kundër popullsisë jo-arabe të rajonit.

Pesë vjet pas përfundimit të asaj krize, Darfuri është një fushë beteje kyçe në një luftë tjetër civile, këtë herë midis ushtrisë së Sudanit dhe Forcave paraushtarake të Mbështetjes së Shpejtë (RSF), origjina e të cilave qëndron në Janjaweed.