Zbulohet një nga dinosaurët më të vjetër në botë në Andet argjentinase

Një ekip shkencëtarësh argjentinas ka zbuluar një skelet pothuajse tërësisht të ruajtur të një specieje të re dinosauri, që jetoi rreth 230 milionë vjet më parë në Andet e Argjentinës. Zbulimi, i cilësuar si një nga më të rëndësishmit e viteve të fundit, u njoftua të mërkurën nga Instituti Kombëtar i Kërkimeve Shkencore dhe Teknike (Conicet).

Specia e re është pagëzuar me emrin Huayracursor jaguensis dhe u gjet në një lartësi prej 3,000 metrash në provincën La Rioja, në veriperëndim të vendit. Studimi i plotë është publikuar në revistën shkencore Nature.

Lexo edhe:
Blu apo vjollcë: Rregulli i artë i shampove me pigment për vajzat bionde
Sipas studiuesve, dinosauri i ri ka jetuar gjatë fundit të periudhës Triasike, një epokë kyçe në historinë e Tokës kur u shfaqën dinosaurët e parë dhe paraardhësit e gjitarëve modernë.

“Ne vlerësojmë se Huayracursor është midis 230 dhe 225 milionë vjeç, çka e bën një nga dinosaurët më të vjetër të njohur deri më sot,” – shpjegoi paleontologu Agustín Martinelli, një nga autorët e studimit.

Ekipi shkencor beson se ky dinosauri ishte barngrënës, pjesë e grupit që më vonë do të përfshinte gjigantët me qafë të gjatë. Ekzemplari i rritur ishte rreth dy metra i gjatë dhe peshonte afërsisht 18 kilogramë.

Skeleti i zbuluar përfshin një kafkë të pjesshme, një shtyllë kurrizore të plotë që shtrihet deri në bisht dhe gjymtyrë pothuajse të plota të përparme e të pasme – një gjendje jashtëzakonisht e rrallë për fosile kaq të lashta.

Shkencëtarët e Conicet besojnë se ky zbulim do të shërbejë si pikë referimi për studimin e evolucionit të dinosaurëve, duke ndihmuar në kuptimin e mënyrës se si u zhvilluan këto krijesa gjigante që dominuan Tokën për miliona vjet