Arsenali e ‘shkatërron’ Tottenhamin, shkëlqen Eberechi Eze me “hattrick”

Arsenali e ‘shkatërron’ Tottenhamin, shkëlqen Eberechi Eze me “hattrick”

Arsenali ka arritur një fitore të madhe në Premierligë, duke e mposhtur rivalin nga qyteti, Tottenhamin me rezultat mjaft bindës.

“Gunners”, të drejtuar nga Mikel Arteta kanë marrë një trepikësh goxha të madh, duke fituar 4-1 ndaj Tottenhamit në “Emirates” e duke shkuar në +6 pikë në krye të tabelës.

Serinë e golave në derbin e Londrës Veriore e hapi Arsenali, me golin e shënuar nga Leandro Trossard në minutën e 36-të, pas asistimit nga Mikel Merino. Ky gol erdhi pas një serie me raste të shumta nga “Topçinjtë”, por që nuk po i konkretizonin rastet.

Pesë minuta më vonë, Arsenali e gjeti edhe golin e dytë.

Kësaj here shënoi Eberechi Eze, i cili doli të jetë ylli i mbrëmjes së sontme. Eze shënoi pas asistimit nga bashkëkombasi i tij, Declan Rice.

Me rezultatin prej 2-0 u mbyll edhe pjesa e parë, teksa ajo e dyta nisi më furishëm.

Eze përsëri doli në skenë, duke shënuar golin e dytë personal në ndeshje dhe të tretin për Arsenalin.

Anglezi shënoi në minutën e 46-të, pasi u asistua nga Jurrien Timber.

Nëntë minuta më vonë, braziliani i Tottenhamit, Richarlison shënoi një supergol.

Sulmuesi shënoi pothuajse nga gjysma e fushës, për të zbutur epërsinë e Arsenalit në vetëm dy gola.

Mirëpo, Arsenali nuk u ngop me vetëm tri gola.

Të besuarit e Mikel Artetës shënuan edhe golin e katërt, kur Eze e kompletoi “hattrickun” e tij.

Me këtë fitore, Arsenali shkon në kuotën e 29 pikëve pas 12 ndeshjeve, duke qenë i pari në tabelë me gjashtë pikë më shumë se Chelsea në vendin e dytë.

Ndërkohë, Tottenhami mbetet i nënti në tabelë me 18 pikë të tubuara.

Në xhiron e ardhshme, Arsenali i shkon Chelseat në “Stamford Bridge” për një tjetër derbi të Londrës.

Në anën tjetër, Tottenhami do të pres po ashtu një klub nga Londra, Fulhamin.