Gjimnazi “7 Marsi” në Tetovë organizon punëtori për bullizmin dhe dhunën me nxënësit e viteve të para

Sot, në Gjimnazin “7 Marsi” në Tetovë është zhvilluar një punëtori edukative me temë “Bullizmi dhe Dhuna”, e organizuar nga psikologia e shkollës, znj. Makfire Sherifi. Aktiviteti u mbajt me nxënësit e viteve të para, me qëllim të rritjes së ndërgjegjësimit për fenomenin e bullizmit dhe mënyrat për të parandaluar dhunën në ambientet shkollore

Gjatë punëtorisë, nxënësit u angazhuan në diskutime dhe ushtrime praktike që synojnë të zhvillojnë aftësitë e komunikimit, respektin ndaj bashkëmoshatarëve dhe zgjidhjen paqësore të konflikteve.

Në një prononcim për media, znj. Makfire Sherifi theksoi:

“Bullizmi dhe dhuna në shkolla janë probleme që kërkojnë ndërgjegjësim dhe veprime të vazhdueshme. Punëtoritë si kjo ndihmojnë nxënësit të kuptojnë pasojat e sjelljeve agresive dhe të mësojnë mënyra konstruktive për të zgjidhur konfliktet. Edukimi dhe dialogu janë çelës për një ambient shkollor të sigurt dhe miqësor.”

Organizimi i këtij aktiviteti është pjesë e programit të shkollës për parandalimin e bullizmit, duke u fokusuar në edukimin e nxënësve për respektin reciprok dhe zhvillimin e marrëdhënieve pozitive brenda komunitetit shkollor.