Miroslav Lajçak pranon komunikimin me Epstein, “kryqëzohet” ish i dërguari i BE për dialogun Kosovë-Serbi

Ish i dërguari i Bashkimit Evropian për dialogun Kosovë-Serbi, Miroslav Lajçak ka pranuar se më parë ka pasur komunikim me financierin pedofil Jeffrey Epstein, por insiston se gjithçka ka qene brenda detyrave të tij diplomatike.

Lajçak mbrohet me pretendimin se vetëm pas arrestimit të Epsteinit, u bë plotësisht e njohur shkalla “ e veprimeve të tij të papranueshme”.

Si diplomat, thotë zyrtari europian, kam kontaktuar me shumë njerëz që kishin influencë, por qëndrimi im ka qenë professional.

Lajçak këmbëngul se e ka ndërgjegjen të pastër dhe nuk ka dalë për asgjë jashtë kornizave të normales. Diplomati sllovak argumentoi gjithashtu se njeriu në jetë “merr vendime bazuar në informacionin që ka për momentin, dhe jo mbi gjëra të cilat ende nuk i di”.

Kreu i Partisë Popullore Sllovake, Andrej Danko, megjithatë ka kërkuar nga Lajçak të japë shpjegime publike për natyrën dhe përmbajtjen e komunikimit, sidomos pasi dokumentet e fundit nga Shtetet e Bashkuara janë bërë publike.

Komiteti për Mbikëqyrjen e Dhomës së Përfaqësuesve të Kongresit të SHBA-së publikoi më 12 nëntor mijëra faqe dokumentesh që lidhen me rastin e financierit të vdekur amerikan. Në dokumente përfshihet edhe komunikimi me email, për të cilin thuhet se ka ndodhur midis atëhershëm ministrit të Jashtëm Lajçak dhe Epsteinit.

Nga dokumentet që publikoi qeveria amerikane rezulton se Epstein në mars të vitit 2018 i ka dërguar Lajçakut një lidhje për një artikull të portalit Daily Beast, në të cilin thuhet se atëhershëm presidenti i SHBA-së, Donald Trump, ishte pranë një kolapsi mendor.

Ish-shefi i diplomacisë sllovake i ka përgjigjur më pas, përmes adresës së tij zyrtare të email-it të ministrisë, duke thënë se gjatë ditës kishte dëgjuar “mjaft dëshmi” për këtë temë. Po kështu, sipas dokumenteve Epstein i drejtohej atij në mënyrë të ngrohtë, me emrin “Miro”, dhe kishte sugjeruar se mund të udhëhiqte ndonjë “projekt evropian”.

Më tej, shtonte se qeveria sllovake së shpejti do të bjerë, “sipas planit”. Një javë pas dërgimit të këtij email-i, qeveria e Robert Fico-s ra.