Në horizont, një sulm i ri amerikan kundër Venezuelës

Momenti i një sulmi amerikan kundër territorit të venezuelas mund të jetë i afërt. Presidenti amerikan, Donald Trump, paralajmëroi se hapësira ajrore mbi dhe përreth Venezuelës duhet të konsiderohet e mbyllur. Ky paralajmërim shënon përshkallëzimin e fundit në mosmarrëveshjet mes Trumpit dhe Nicolas Maduros të Venezuelës. “Për të gjitha linjat ajrore, pilotët, trafikantët e drogës dhe trafikantët e qenieve njerëzore”, shkroi Trump në rrjetin e tij social, Truth Social, “ju lutem konsiderojeni hapësirën ajrore mbi dhe përreth Venezuelës si të mbyllur plotësisht”.

Presidenti amerikan nuk dha detaje të tjera për këtë çështje. Deklarata vjen në kohën kur administrata e Trumpit po e shton presionin ndaj Venezuelës me një dislokim të madh ushtarak në Karaibe, që përfshin aeroplanmbajtësen më të madhe në botë. Uashingtoni thotë se synimi është frenimi i trafikut të drogës, por Karakasi këmbëngul se qëllimi përfundimtar është ndryshimi i regjimit në Venezuelë.

Nga ana tjetër Nju Jork Times ka zbuluar se Presidenti i SHBA Donald Trump javën e kaluar ka zhvilluar një bisedë telefonike me Presidentin e Venezuelës Nicolas Maduro.

Telefonata e dy liderëve ka ndodhur në mes të një krize në marrëdhëniet midis dy shteteve që mund të përshkallëzohet deri në armiqësi që çon hyrjen e trupave amerikane në Venezuelë. New York Times duke cituar njerëz të njohur me çështjen raporton se të dy udhëheqësit diskutuan gjithashtu për një takim të mundshëm midis tyre, por aktualisht nuk ka plane për një takim të tillë. Sekretari i Shtetit i SHBA-së, Marco Rubio, ishte gjithashtu i pranishëm në bisedën që u zhvillua në fund të javës së kaluar.

Ndërkohë, disa ditë më parë, Axios raportoi se Trump dëshiron të ketë kontakte të drejtpërdrejta me Maduron. Shtëpia e Bardhë nuk komentoi zyrtarisht mbi raportin e New York Times dhe qeveria venezueliane refuzoi të komentonte, por dy persona pranë qeverisë venezueliane konfirmuan se u zhvillua një telefonatë.

Forcat amerikane kanë kryer sulme kundër më shumë se 20 anijeve të dyshuara për kontrabandë droge nga Venezuela në Detin e Karaibeve dhe Oqeanin Paqësor që nga fillimi i shtatorit, duke vrarë më shumë se 80 persona. Tensionet rajonale janë rritur si rezultat i fushatës dhe dislokimit ushtarak. The New York Times raportoi të premten se dy udhëheqësit kishin folur me telefon javën e kaluar dhe kishin diskutuar për një takim të mundshëm në Shtetet e Bashkuara.