Përmbytje dhe rrëshqitje dheu në lindje të vendit – QMK: Institucionet janë në terren, kërkohet mbështetje shtesë

Rajoni lindor i Maqedonisë së Veriut u përball sot me përmbytje dhe rrëshqitje dheu si pasojë e reshjeve të dendura të ditëve të fundit. Komuna Çeshinovë–Obleshevë, si dhe disa akse rrugore kryesore, janë ndër më të goditurat. Drejtori i Qendrës për Menaxhim me Kriza, Muhamed Ali, bëri të ditur se të gjitha ekipet kompetente janë aktivizuar në terren dhe se është kërkuar mbështetje shtesë nga institucionet shtetërore për menaxhim më efikas të situatës.

Më poshtë njoftimi i plotë i QMK-së:

Oborret dhe disa hapësira brenda objekteve në disa lokacione të Komunës Çeshinovë–Obleshevë, përfshirë fshatrat Çeshinovë, Obleshevë dhe Çiflik, u përmbytën mëngjesin e sotëm si rezultat i reshjeve të dendura të shiut që ditëve të fundit e kanë përfshirë rajonin lindor.

Sipas informacioneve të marra nga Kryetari i Komunës, vetëqeverisja lokale me të gjitha resurset e saj të disponueshme është aktivisht e angazhuar në terren. Në intervenime po marrin pjesë edhe NJTZ Koçani, Ndërmarrja e Ujërave “Bregallnica” dhe QMK Koçani. Po ashtu, është kërkuar mbështetje shtesë materiale-teknike, veçanërisht për nxjerrjen e ujit nga objektet e përmbytura.

Për shkak të reshjeve të mëdha, lumenjtë Bregallnica dhe lumi i Koçanit kanë nivel të rritur të ujit, dhe në disa lokacione në komunat Shtip dhe Çeshinovë–Obleshevë është vërejtur dalja e tyre nga shtrati.

Si pasojë e reshjeve, mëngjesin e sotëm janë paraqitur rrëshqitje dheu në autostradën e shpejtë Radovish–Shtip dhe në aksin rrugor Zletovë – diga Knezhevë. Për ngjarjet, Qendra për Menaxhim me Kriza informoi menjëherë ndërmarrjen “Makedonija pat”, ekipet e së cilës dolën në terren dhe ndërhynë siç duhet.

Rrëshqitje dheu është paraqitur edhe në fshatin Likovë, në vendin e quajtur Kisella Voda. Nga Komuna e Likovës jemi njoftuar se komuna disponon me resurse të kufizuara për intervenime të këtij tipi dhe, për shkak të seriozitetit dhe rrezikut të përkeqësimit të mëtejshëm të situatës, është kërkuar përfshirja e institucioneve shtetërore në sanimin e rrëshqitjes së dheut.