Real Madridi mori një barazim me shumë polemika ndaj Elches – dy golat e madrilenëve kontestohen në Spanjë

Mbrëmë, Elche dhe Real Madrid u ndanë në barazim 2-2 në ndeshjen e xhiros së 13-të të La Ligas.

Në shikim të parë, shumëkush do ta quante këtë një hap të gabuar të Realit në garën për titull, por ata që e ndoqën ndeshjen panë sërish dy vendime të dyshimta në favor të madrilenëve.

Elche kaloi në epërsi në minutën e 52-të me golin e Febas. Por fundi i ndeshjes solli dramë të vërtetë. Reali barazoi në minutën e 78-të me anë të Huijsen, megjithatë goli ngjalli shumë polemika.

Mediat spanjolle raportuan se para golit, Bellingham i dha asistin shokut të skuadrës me dorë, por pavarësisht ndërhyrjes së mundshme të VAR-it, goli u pranua.

Elche rimori epërsinë në minutën e 84-të me golin e Rodriguez, por vetëm tre minuta më vonë shpërtheu një tjetër situatë e kontestuar.

Gjatë një skene të ngjeshur në zonën e vendasve, Vinicius dukshëm faulloi portierin Inaki Pena, madje i shkaktoi edhe gjakderdhje në hundë, por loja vazhdoi dhe Bellingham shënoi golin e barazimit. As kësaj radhe VAR nuk ndërhyri.

Gazeta spanjolle Marca, e njohur si e afërt me Real Madridin, pranoi pas ndeshjes se ndërhyrja ndaj Penës ishte faull i qartë.

Reali tashmë ka barazuar dy ndeshje radhazi, përfshirë atë të javës së kaluar kundër Rayo Vallecanos, dhe Barcelona është afruar në vetëm një pikë diferencë.