SPB Ohër ngrit kallëzim penal ndaj 45-vjeçarit nga Veleshta për sulm ndaj personit zyrtar

Sektori për Punë të Brendshme Ohër ka ngritur kallëzim penal kundër I.I. (45) nga fshati Veleshtë i rrethit të Strugës, për shkak të bazave të dyshimit se ka kryer veprën penale “sulm ndaj personit zyrtar gjatë kryerjes së punëve në fushën e sigurisë”.

Sipas informacioneve të policisë, ngjarja ka ndodhur më 31.10.2025, në rrugën e vjetër Strugë–Ohër, ku i dyshuari ka sulmuar fizikisht një nëpunës policor, i cili në atë moment ka qenë duke kryer detyrat e tij zyrtare. Sulmi ka shkaktuar ndërprerjen e veprimeve të policisë dhe ka rrezikuar sigurinë e zyrtarit.

Materialet e rastit janë dorëzuar në Prokurorinë Publike për procedurë të mëtejshme, ndërsa ndaj të dyshuarit priten masa në përputhje me ligjin. Autoritetet theksojnë se sulmet ndaj personave zyrtarë trajtohen me seriozitet të lartë, pasi përbëjnë rrezik për rendin dhe sigurinë publike.TS