U dënua 27 vite për komplot për grusht shteti, ish-presidenti brazilian Bolsonaro lë arrestin e shtëpisë dhe përfundon në paraburgim

Ish-presidenti i Brazilit, Jair Bolsonaro, u mor në ndalim nga policia federale të shtunën, tha avokati i tij për Reuters, duke i dhënë fund muajve të arrestit në shtëpi ndërsa ai apelon një vendim të Gjykatës së Lartë për sulme ndaj demokracisë së vendit.

Avokati i Bolsonaros, Celso Vilardi, nuk dha një arsye për ndalimin. Një person i njohur me çështjen tha se masa ishte preventive dhe lidhej me kushtet e arrestit në shtëpi.

Një përfaqësues i policisë federale konfirmoi se Bolsonaro po i nënshtrohej ekzaminimeve të procedurës së marrjes në ndalim, në Brasilia, të shtunën në mëngjes.

Ish-lideri i djathtë u dënua në shtator me 27 vjet e tre muaj burg për komplot për grusht shteti, me synimin për të qëndruar në pushtet pasi humbi zgjedhjet e vitit 2022 ndaj presidentit të majtë Luiz Inacio Lula da Silva.

Bolsonaro u identifikua si udhëheqësi dhe përfituesi kryesor i një skeme për të penguar marrjen e detyrës nga Lula në vitin 2023. Megjithatë, gjykatat ende nuk kanë lëshuar një urdhër përfundimtar arresti në këtë çështje, pasi Bolsonaro nuk i ka ezauruar të gjitha mundësitë e apelimit citon Reuters.

Prej më shumë se 100 ditësh, Bolsonaro ka qenë nën arrest të rreptë shtëpiak për shkelje të masave paraprake në një çështje tjetër, që lidhet me dyshimet se ka kërkuar ndërhyrje të SHBA-së për të ndaluar procesin penal kundër tij.

Presidenti amerikan Donald Trump, i cili ka pasur marrëdhënie të mira me Bolsonaron, e ka quajtur çështjen ndaj tij “gjueti shtrigash”. Trump vendosi sanksione ndaj gjykatësit Moraes, i cili mbikëqyr çështjen, si dhe një tarifë 50% për disa mallra braziliane të importuara në SHBA, tarifa që ai ka nisur t’i reduktojë këtë muaj.

Gjatë arrestit në shtëpi, Bolsonaros i ishte ndaluar përdorimi i rrjeteve sociale, por ai ka pranuar vizita nga aleatë politikë. Mbrojtja e tij pritet të kërkojë që dënimi t’i konvertohet në arrest shtëpie, duke u bazuar në probleme shëndetësore.

Ish-presidenti, i cili u godit me thikë në bark gjatë një aktiviteti elektoral në vitin 2018, ka pasur që prej asaj kohe disa shtrime në spital dhe ndërhyrje kirurgjikale.

Bolsonaro është ndaluar më herët nga kandidimi deri në vitin 2030, pasi Gjykata Elektorale e Brazilit e gjeti fajtor për abuzim me detyrën gjatë fushatës së tij të rizgjedhjes në vitin 2022.