A duhet t’u kthehen paratë qytetarëve?!

Apo është koha për një zgjim të madh qytetar?

Është momenti që ne, qytetarë të nderuar, të dalim në mbrojtje të vlerave dhe jetës, ashtu siç ndodh kudo në botën e qytetëruar dhe demokratike. Nuk duhet të lejojmë më tej makutërinë e disa sharlatanëve që kanë në dorë jetën e njeriut dhe që, dita-ditës, shkelin dhe nëpërkëmbin dinjitetin njerëzor.

Mjaft më, o hajna!

Një fjalë e popullit thotë: “Turpi s’e mbyt askënd”.
Unë them se të paftyrët nuk njohin turp fare.

Kafshatë që s’kapërdihet asht, or vlla, mjerimi,
kafshatë që të mbetë në fyt e të zë trishtimi!

Vjedhja përmes faturave të energjisë elektrike, të cilat në shumë raste tejkalojnë disa herë shifrat reale të konsumit, kryhet nga Operatori i Sistemit të Shpërndarjes, duke përfituar e gjithë hierarkia – që nga elektricistët e deri te qeveritarët.

Transparenca, ngritja e zërit dhe vetëdija qytetare janë çelësi për ta luftuar këtë të keqe.
Duhet të jemi të informuar. Duhet të jemi të guximshëm. Sot gjithçka është publike.

Problemi nuk është rritja e çmimit të energjisë elektrike në bursë.
Problemi është korrupsioni i kësaj qeverie.
Problemi janë aferat dhe tenderët e dyshimtë.
Problemi janë qindra patronazhistë të punësuar në sektorin e energjisë, të cilët paguhen nga buxheti i shtetit.

Pra, fatkeqësia nuk është rritja e çmimeve në bursë, por kjo qeveri që çdo ditë e më tepër u vjedh xhepat shqiptarëve.

Në të gjitha këto raste, shkelet çdo pikë e Ligjit për mbrojtjen e konsumatorëve, ligjit për shitjen e energjisë, mënyrën e faturimit dhe shërbimet. Ligji është i qartë:
shitja e energjisë elektrike llogaritet vetëm mbi bazën e konsumit real, i matur me aparate matëse, dhe kjo vlerë duhet të paraqitet qartë, saktë dhe e lexueshme në faturë, e jo në mënyrë të dyshimtë dhe të paarsyeshme për qytetarin.

Përfundim

Nuk e kuptoj se mbi çfarë kriteresh bazohen elektricistët kur shënojnë shuma kaq të larta për pagesë dhe si mund të faturohen qytetarët pa asnjë të dhënë konkrete për kilovat-orët e harxhuara.
Faturat aforfe janë veprime të qëllimshme për të dobësuar ekonominë e qytetarit dhe për të pasuruar në mënyrë të paligjshme një grup të ngushtë.

Operatori i Sistemit të Shpërndarjes tregohet i gatshëm vetëm për të ndëshkuar qytetarët, por asnjëherë nuk ndërhyn kur atyre u faturohen shuma të jashtëligjshme dhe të pabazuara.

Turp ju qoftë!
Mjerë populli me këta hajna!

Pedagog:
Naim Kurtishi