Ahmeti: Amerikë, NATO, Evropë, faleminderit që mbështetët UÇK-në (VIDEO)
Kryetari i BDI-së, Ali Ahmeti, ka marrë pjesë në tubimin protestues të mbajtur sot në Shkup, ku qytetarët shprehën mbështetje për ish-udhëheqësit e Ushtrisë Çlirimtare të Kosovës. Protesta u organizua nga Organizata e Veteranëve.
Gjatë fjalës së tij, Ahmeti falënderoi Shtetet e Bashkuara të Amerikës, Evropën dhe NATO-n për mbështetjen e dhënë UÇK-së, duke theksuar se kjo mbështetje ishte vendimtare në ndalimin e gjenocidit ndaj popullit të Kosovës, raporton Tetovasot.
“Jemi mbledhur sot në sheshin ‘Skënderbe’, një vend historik për kufijtë e Evropës, për të mos lejuar pushtimin e saj. Jemi këtu pranë vendeve ku vepruan figura të shquara të kombit tonë, si Hasan Prishtina, Pjetër Bogdani dhe Nexhat Agolli. Hasan Prishtina u vra për lirinë e kombit, Pjetër Bogdani dha dije dhe filozofi evropiane, ndërsa Nexhat Agolli u pushkatua nga regjimi për kërkesën e tij për liri, drejtësi dhe barazi për popullin,” tha Ahmeti.
Ai theksoi se mbështetja ndërkombëtare ishte thelbësore për suksesin e luftës çlirimtare:
“Amerikë, NATO, Evropë, faleminderit që filozofinë dhe veprimtarinë e njerëzve më të mëdhenj të kombit tonë e keni mbështetur përmes Ushtrisë Çlirimtare të Kosovës, duke ndalur gjenocidin ndaj popullit të saj,” përfundoi Ahmeti.
