Ambasada Amerikane: Forcojmë bashkëpunimin SHBA-SPAK përmes trajnimeve të hetuesve në FBI

Ambasada amerikane në Tiranë ka reaguar përmes një postimi në “Facebook” lidhur me diplomimin e hetuesit të BKH-së, Eduart Kaloshi në Akademinë Kombëtare të FBI-së. Ambasada thekson se kjo çon përpara bashkëpunimin mes dy vendeve.

Më tej në reagim theksohet se Kaloshi do të sjellë ekspertizë të re në përpjekjet e SPAK në luftën kundër korrupsionit dhe krimit të organizuar.

“Çuarja përpara e bashkëpunimit në zbatimin e ligjit mes Shteteve të Bashkuara dhe Shqipërisë fillon me ofrimin e mundësive të trajnimeve të nivelit më të lartë për oficerët më të përkushtuar të Shqipërisë. Ne përgëzojmë hetuesin e SPAK/BKH, Eduart Kaloshi, për diplomimin e tij këtë muaj në Akademinë Kombëtare të FBI-së.

Eduarti i bashkohet grupit të shquar të ish-studentëve ndërkombëtarë të FBI-së, duke sjellë aftësi dhe ekspertizë të re e të vlefshme në përpjekjet e vendosura të SPAK në luftën kundër korrupsionit dhe krimit të organizuar. Arritjet e tij do të forcojnë më tej bashkëpunimin e Shteteve të Bashkuara me SPAK dhe do të ndihmojnë në ndërtimin e një të ardhmeje më të sigurt dhe më të begatë për Shqipërinë dhe qytetarët e saj”, shkruan Ambasada Amerikane.