Arrestohet një person në Turqi, po planifikonte sulme për Vitin e Ri

Autoritetet turke kanë thënë se kanë arrestuar një pjesëtar të dyshuar të grupit ekstremist të Shtetit Islamik, i cili po planifikonte sulme gjatë festimeve të Vitit të Ri.

Ibrahim Burtakucin u kap në një operacion të përbashkët të kryer nga policia dhe Agjencia Kombëtare e Inteligjencës në qytetin juglindor të Malatyas, raportoi AP.

Zyrtarët e sigurisë thanë se Burtakucin ishte në kontakt me shumë simpatizantë të IS-it në Turqi dhe jashtë saj dhe gjithashtu po kërkonte një mundësi për t’iu bashkuar luftimeve të vazhdueshme në zonat e konfliktit.

Autoritetet gjithashtu sekuestruan materiale digjitale gjatë bastisjes së shtëpisë së tij.

Arrestimi u raportua një ditë pasi Zyra e Prokurorit të Stambollit tha se autoritetet turke kryen bastisje në të cilat arrestuan mbi 100 anëtarë të dyshuar të Shtetit Islamik, të cilët dyshohen se po planifikonin sulme kundër festimeve të Krishtlindjeve dhe Vitit të Ri.