Delegacioni i Universitetit të Tetovës realizoi vizitë zyrtare në Universitetin Shtetëror Sam Houston në SHBA

Universiteti i Tetovës vazhdon t’i kushtojë një rëndësi të veçantë ndërkombëtarizimit dhe krijimit të kushteve lehtësuese për studentët që dëshirojnë të vijojnë studimet në Shtetet e Bashkuara të Amerikës. Një delegacion i Universitetit të Tetovës, i kryesuar nga Rektori, Prof. Dr. Jusuf Zejneli, dhe Kryetari i Senatit të UT, Prof. Dr. Kenan Ferati, realizoi një vizitë zyrtare në Universitetin Shtetëror Sam Houston.
Kjo vizitë dëshmon vazhdimësinë dhe përkushtimin për forcimin e partneriteteve, duke synuar thellimin e bashkëpunimit ndëruniversitar, zgjerimin e mundësive për mobilitet të studentëve dhe stafit akademik, zhvillimin e projekteve të përbashkëta kërkimore, si dhe promovimin e shkëmbimeve kulturore. Gjithashtu, një fokus i veçantë i bashkëpunimit mbetet edhe fuqizimi i lidhjeve me komunitetin shqiptar në SHBA.
Sam Houston State University ka inicuar tashmë bursën “Bahri Fazliu (Gzimi) Memorial Scholarship”, e dedikuar për studentët shqiptarë që mishërojnë vlerat për të cilat ai besoi.
Përmes kësaj vizite, Universiteti i Tetovës synon t’i konsolidojë partneritetet ekzistuese dhe të krijojë hapësira të reja bashkëpunimi në fusha me rëndësi për zhvillimin akademik dhe institucional.