Me mbështetjen e MASH-it dhe Fakultetit Ekonomik në Shkup, qendrat rajonale për arsim profesional dhe trajnim do të hapin kompani reale shkollore
Në punëtorinë dy ditore në Shkup, udhëheqësitë, nxënësit dhe mësimdhënësit nga qendrat rajonale për arsim profesional dhe trajnim do të mësojnë si të përgatitin plane biznesi për themelimin e kompanive shkollore reale, nën mentorimin e profesorëve dhe studentëve nga Fakulteti Ekonomik i Universitetit “Shën Kirili dhe Metodi”. Përfitimet që do të sigurohen janë të shumta, ndërsa më e rëndësishmja është se do të rriten mundësitë praktike për nxënësit, dhe shkollat do të fitojnë të ardhura shtesë.
Këtë e theksoi Ministrja e Arsimit dhe Shkencës, Prof.Dr.Vesna Janevska, në fillim të punëtorisë që po mbahet në Fakultetin Ekonomik, duke theksuar se pret që shumë shpejt të hapen edhe kompanitë e para shkollore reale në kuadër të këtyre institucioneve arsimore.
“Kompanitë shkollore reale kontribuojnë në zhvillimin e aftësive sipërmarrëse dhe afariste tek nxënësit, që do të thotë përgatitje më të mirë për përfshirje në ekonomi. Gjithashtu, ushtrimi i aktiviteteve komerciale shtesë nga shkollat u sjell të ardhura, të cilat mund të ndihmojnë në sigurimin e zhvillimit të qëndrueshëm dhe avancimin e vazhdueshëm të cilësisë së procesit edukativo-arsimor ”, theksoi Janevska
Ministrja informoi se për momentin ekzistojnë shtatë qendra rajonale për arsim profesional dhe trajnim, ndërsa vitin e ardhshëm duhet të formohet edhe qendra e tetë, e fundit. Në qendrat deri më tani nuk janë themeluar kompani reale shkollore. Ministrja shprehu mirënjohje ndaj Fakultetit Ekonomik, por edhe ndaj Ambasadës së Zvicrës për mbështetjen e kësaj iniciative, si dhe ndaj udhëheqësive dhe të punësuarve në qendrat rajonale për interesimin për ta zgjeruar veprimtarinë e institucioneve arsimore në përputhje me Ligjin për Arsimin Profesional dhe Trajnimin.
Në hapjen e punëtorisë fjalim mbajtën edhe dekani i fakultetit, Prof.Dr. Mijallçe Santa, si dhe profesorë Aleksandra Janeska Iliev dhe Stojan Debarliev.
