Nuk e vendosi flamurin maqedonas, Mendi Qyra i përkulet Mickoskit dhe i kërkon falje: Nuk do të përsëritet më

Kryeministri Hristijan Mickoski dje shprehu pakënaqësi ndaj kryetarit të Komunës së Strugës, Mendi Qyra, pasi gjatë festimeve të 28 Nëntorit në shëtitoren e Lumit Drin u vendosën vetëm flamuj shqiptarë, por jo edhe flamuri shtetëror, siç e kërkon ligji.

Si pasojë, Mickoski deklaroi se nuk pret që këshilltarët e VMRO-DPMNE-së të mbështesin më punën e Qyrës në këshillin komunal.

Pas reagimit të kryeministrit, sot Mendi Qyra kërkoi falje dhe theksoi se situata nuk do të përsëritet.

“Mendoj se kjo deklaratë nuk do të ndikojë në bashkëpunimin e mëtejshëm me kryeministrin dhe me Komunën e Strugës në përgjithësi, duke pasur parasysh se komuna është projekt shumë më i madh se një lëshim në një manifestim. Besoj se bashkëpunimi me këshilltarët e VMRO-DPMNE-së do të vazhdojë të jetë në nivel, pasi jemi në bisedime për mënyrën se si do të zhvillohet mandati katërvjeçar në Strugë”, tha Qyra.

Vlen të përmendet se Qyra, ashtu si shumica e kryetarëve të VLEN-it, ka fituar mandatin me mbështetjen e votuesve të VMRO-DPMNE-së, ndonëse presioni dhe paralajmërimet politike nga Mickoski ndaj këtyre kryetarëve janë bërë tashmë të dukshme.