Qeveria planifikon blerjen e 100 automjeteve të reja për ndihmën e shpejtë dhe zgjidhje për parkingun te Qendra Klinike

Ministri për shëndetësi në Maqedoninë e Veriut, Azir Aliu, ka sqaruar se një nga vendimet e fundit të Qeverisë së Maqedonisë së Veriut është blerja e 100 automjeteve për ndihmën e shpejtë.

“Me këtë vendim sigurojmë mjete për furnizimin e 100 automjeteve të reja të ndihmës së shpejtë, me vlerë të përgjithshme prej 461.250.000 denarë, duke marrë përsipër obligime në kuadër të pjesës zhvillimore të buxhetit për katër vitet e ardhshme”, njoftoi Aliu.

Përmes këtyre automjeteve, Qeveria planifikon bartje më të shpejtë ë pacientëve në nivelin sekondar dhe terciar.

“Toka e hapësirës së parkimit do të regjistrohet në pronësi të Republikës së Maqedonisë së Veriut, me çka hiqet pengesa administrative për nënshkrimin e kontratës me Ndërmarrjen Publike “Parkingu i Qytetit – Shkup”. Kjo kontratë do të mundësojë modernizimin dhe rritjen e ndjeshme të kapaciteteve të parkimit, si dhe vendosjen e rendit”, njoftoi ministri Aliu në lidhje me parkingun te Qendra Klinike “Nënë Tereza”.