Shqetësime për Realin: dy lëndime pas fitore ndaj Athletic Bilbaos

Real Madrid regjistroi një nga performancat më të kompletuara të sezonit në La Liga, duke mposhtur Athletic Club 3-0, por fitorja u errësua nga dy lëndime të rëndësishme në skuadër.

Trent Alexander-Arnold u tërhoq nga loja pas minutës së 55-të, pas një goditjeje që mund të jetë një problem me adduktorin në kofshën e majtë, ndërsa Eduardo Camavinga doli nga fusha dhjetë minuta më vonë për shkak të një dëmtimi në kyçin e këmbës.

Të dy lojtarët do t’i nënshtrohen testeve për të përcaktuar seriozitetin e dëmtimeve, të cilat mund t’i mbajnë jashtë nga një javë deri në gjashtë.

Xabi Alonso përgëzoi skuadrën për rikthimin te fitorja pas tre ndeshjesh pa fitore dhe theksoi rëndësinë e vazhdimit të sezonit.

Real Madrid do të përballet me Celta Vigo këtë fundjavë në Santiago Bernabeu dhe më pas pret Manchester City në Champions League, përpara udhëtimeve te Alaves dhe Sevilla në La Liga.

Klubi shpreson që deri në fund të vitit, pjesa më e madhe e skuadrës të jetë e gatshme, me Dani Carvajal që pritet të rikthehet në janar 2026.