Tensione mes Arabisë Saudite dhe Emirateve të Bashkuara Arabe për shkak të Jemenit

Arabia Saudite ka akuzuar publikisht aleatin e saj të ngushtë Emiratet e Bashkuara Arabe për veprime “shumë të rrezikshme” në Jemen, teksa ka kryer sulme ajrore “të kufizuara” në portin Mukalla të vendit të martën në mëngjes, pas akuzave se dy anije nga Emiratet e Bashkuara Arabe kishin dërguar armë dhe automjete luftarake te forcat separatiste.

Emiratet e Bashkuara Arabe i hodhën poshtë akuzat, shprehën habi për sulmet dhe deklaruan se automjetet ishin të destinuara për t’iu dërguar forcave emirate në Jemen, pas koordinimit me koalicionin ushtarak të udhëhequr nga Arabia Saudite.

Në një deklaratë, ministria e Jashtme Saudite i ka quajtur “hapat” e ndërmarrë nga Emiratet e Bashkuara Arabe një kërcënim për sigurinë e saj kombëtare, teksa veprimi shënon një përshkallëzim që nxjerr në pah një përçarje midis partnerëve më të ngushtë të rajonit.

Deklarata saudite u lëshua pak çaste pas një fjalimi nga kreu i Këshillit Presidencial të Jemenit, Rashad Al Olimi, një organ i mbështetur nga Arabia Saudite, i cili akuzoi Emiratet e Bashkuara Arabe për “drejtimin” e forcave për t’u “rebeluar kundër autoritetit shtetëror” dhe për “përshkallëzimin ushtarak” në vend.

“Mbretëria thekson se çdo kërcënim për sigurinë e saj kombëtare është një vijë e kuqe dhe Mbretëria nuk do të hezitojë të ndërmarrë të gjitha hapat dhe masat e nevojshme për t’u përballur dhe neutralizuar çdo kërcënim të tillë”, thuhet në deklaratën e ministrisë së Jashtme Saudite.

Arabia Saudite ka thënë se Emiratet e Bashkuara Arabe po “ushtronin presion” mbi Këshillin Kalimtar Jugor, një forcë ushtarake e mbështetur nga Emiratet e Bashkuara Arabe, për të kryer operacione në kufirin e mbretërisë, një akuzë që Abu Dhabi e ka dënuar dhe hedhur poshtë.

“Emiratet e Bashkuara Arabe kategorikisht refuzojnë çdo përpjekje për ta implikuar atë në tensionet midis palëve jemenase, dhe dënojnë akuzat se ka ushtruar presion ose ka drejtuar ndonjë palë jemenase për të kryer operacione ushtarake që kërcënojnë sigurinë e Mbretërisë motër të Arabisë Saudite ose që synojnë kufijtë e saj”, thuhet në deklaratën e ministrisë së Jashtme të Emirateve të Bashkuara Arabe.

Këtë muaj, Këshilli Kalimtar Jugor i mbështetur nga Emiratet e Bashkuara Arabe ka nisur një ofensivë duke marrë kontrollin e provincave kryesore në Jemen – një veprim që ka zemëruar qeverinë e mbështetur nga Arabia Saudite, e cila thotë se veprimi ushtarak fragmentoi një betejë me forcat

Huthi të mbështetura nga Irani në veri.

Grupet aleate me Këshillin Kalimtar Jugor kishin hyrë në provincën e pasur me naftë të Hadramout, duke rikthyer thirrjet që Jemeni jugor të shkëputet si shtet i pavarur.

Ndërkohë, grupet e mbështetura nga Arabia Saudite në Jemen u bënë thirrje të gjitha forcave emirate të largoheshin nga territori i Jemenit brenda 24 orëve dhe i dhanë fund një pakti mbrojtës me Emiratet e Bashkuara Arabe.

Arabia Saudite dhe Emiratet e Bashkuara Arabe – të dy gjigantë fqinjë të naftës, janë dy aleatë të ngushtë dhe janë partnerë kryesorë të Shteteve të Bashkuara që kontrollojnë triliona në asete globale.

Para përshkallëzimit, sekretari amerikan i Shtetit, Marco Rubio, bëri thirrje për diplomaci dhe përmbajtje.

“Shtetet e Bashkuara janë të shqetësuara nga ngjarjet e fundit në Jemenin juglindor. Ne kërkojmë përmbajtje dhe diplomaci të vazhdueshme, me qëllim arritjen e një zgjidhjeje të qëndrueshme. Jemi mirënjohës për udhëheqjen diplomatike të partnerëve tanë, Mbretërisë së Arabisë Saudite dhe Emirateve të Bashkuara Arabe dhe mbetemi mbështetës të të gjitha përpjekjeve për të avancuar interesat tona të përbashkëta të sigurisë”, ka shkruar ai në X.