Tusk: Pavarësia e Polonisë në rrezik nëse Ukraina kapitullon nga vendimet e këqija

Kryeministri polak, Donald Tusk ka deklaruar se pavarësia e Polonisë do të kërcënohej nëse si rezultat i vendimeve të këqija ose mungesës së veprimit nga ana e Evropës Ukraina detyrohet të kapitullojë.

“Dua që të gjithë ta kuptojnë jo vetëm kolegët tanë këtu në Evropë, por edhe të gjithë në Poloni se kur flasim për nevojën për të mbështetur Ukrainën duke përdorur fonde ruse, kjo ndodh sepse e dimë shumë mirë se pavarësia e Ukrainës largon rrezikun e agresionit ose luftës nga kufijtë polakë.

Përkundrazi, rënia e Ukrainës si rezultat i kësaj lufte do të thoshte një kërcënim i drejtpërdrejtë për Poloninë”, tha Tusk.

Sipas tij, udhëheqësit evropianë ranë dakord në Samitin në Bruksel të punojnë se si të financojnë Ukrainën në vitin 2026 dhe 2027 përmes përdorimit të aseteve të ngrira ruse në vend të huamarrjes së përbashkët të BE-së.

“Ne sigurisht që po kërkojmë përparim të konsiderueshëm dhe ky përparim do të thotë që të gjithë bien dakord se përdorimi i aseteve ruse për Ukrainën do të ishte i justifikuar dhe i mirë për Evropën. Megjithatë, disa vende do të luftojnë deri në fund për të maksimizuar garancitë për veten e tyre”, tha ai.