Ayatollah-i iranian e akuzoi ‘kriminelin’ Trump për protestat ku vdiqën mijëra njerëz

Udhëheqësi suprem i Iranit, ayatollah Ali Khamenei, e akuzoi Donald Trump-in për protestat në vend, pasi grupet për të drejtat e njeriut njoftuan se mijëra persona kanë vdekur gjatë shtypjes së dhunshme nga forcat e sigurisë. Protestat filluan më 28 dhjetor për shkak të problemeve në rritje ekonomike dhe u shndërruan në demonstrata të gjera, ku kërkohej fundi i sundimit fetar në Iran.

Duke i ftuar iranianët të vazhdojnë të protestojnë, Trump vazhdimisht kërcënoi se do të ndërhynte dhe premtoi se do të “merrte masa shumë të forta” nëse Irani fillonte të ekzekutonte demonstruesit. Ai dje i falënderoi udhëheqësit iranianë për shkak se kanë anuluar varjet masive, ndërsa Irani njoftoi se nuk ka pasur ndonjë plan për të varur demonstruesit.

“Ne nuk do ta përfshijmë vendin në luftë, por nuk do të lejojmë që kriminelët vendas dhe ndërkombëtarë të mbeten pa u ndëshkuar”, tha Khamenei.

Autoritetet iraniane akuzuan terroristë të paidentifikuar për vdekjen e mijëra personave gjatë protestave, duke thënë se Izraeli dhe SHBA-të janë përgjegjës për organizimin e tyre.

“E konsiderojmë presidentin e SHBA-së kriminel për shkak të viktimave, dëmeve dhe shpifjeve që i ka shkaktuar kombit iranian. Ata që janë të lidhur me Izraelin dhe SHBA-të shkaktuan dëme të mëdha, vranë disa mijëra persona, ndezën zjarre, shkatërruan pronë publike dhe shkaktuan kaos”, tha Khamenei.

Ai i përshkroi demonstruesit si “këmba e ushtrisë së SHBA-së” që kanë shkatërruar xhami dhe qendra arsimore.
Sipas organizatës aktiviste HRANA, gjatë protestave u vranë 3.090 persona, nga të cilët 2.885 ishin demonstrues, ndërsa mbi 22.000 u arrestuan. Irani për disa ditë ishte pa internet, dhe bllokada u hoq pjesërisht vetëm sot.