Barça arrin marrëveshje për vazhdimin e kontratës me yllin e skuadrës

Barcelona është gati të nënshkruajë një kontratë të re me Fermin Lopez në javët në vijim, me synimin për të siguruar të ardhmen e tij për disa sezone të ardhshme. 22-vjeçari është shndërruar në një nga lojtarët më të besueshëm të Barcelonës nën drejtimin e Hansi Flick dhe tashmë po konkurron seriozisht për një vend titullari.

Megjithatë, gjatë verës nuk kishte unitet të plotë brenda klubit për këtë vlerësim, duke lënë derën hapur për një largim të mundshëm. Chelsea erdhi me një ofertë për Fermin Lopez, të cilën reprezentuesi spanjoll përfundimisht e refuzoi për të qëndruar te Barcelona.

Por me interesimin e Chelseat që raportohet se vazhdon, dhe me formën e Lopez që tregon se sezoni i kaluar nuk ishte thjesht një shpërthim i përkohshëm, Barcelona ka hyrë në bisedime për një marrëveshje të re.

Sipas Fabrizio Romanos, Barcelona ka arritur tashmë një marrëveshje verbale me Lopez dhe agjentët e tij për kontratën e re. Ajo do të zgjasë kontratën aktuale, e cila skadon në vitin 2029, edhe për dy vite të tjera.

Pritet gjithashtu të përfshijë një rritje të ndjeshme të pagës, ndërsa firma zyrtare mund të vijë brenda një ose dy javësh.

Në gjysmën e dytë të sezonit të kaluar, Lopez la përshtypje shumë të mirë sidomos në mungesë të Dani Olmos, i cili kishte probleme të shpeshta me dëmtimet.

Edhe pse në asnjë moment nuk ishte titullar i padiskutueshëm, ai e mbylli sezonin e kaluar me tetë gola dhe 10 asistime në 46 paraqitje.

Këtë sezon tashmë i ka përmirësuar këto shifra, me 10 gola dhe 10 asistime në 25 ndeshje, duke regjistruar një mesatare mbresëlënëse kontributi në gola: një çdo 77 minuta.

Kjo formë e ka vënë nën presion Dani Olmon, një investim prej 55 milionë eurosh nga ana e klubit, për vendin e tij në formacion.

Dëmtimet e Raphinhas dhe Pedrit kanë bërë që të dy të kenë minuta të rregullta kur kanë qenë të gatshëm, por Flick do të ketë disa vendime të vështira për të marrë në fazën përfundimtare të sezonit.