Bari në Zvicër, ku humbën jetën 40 persona, nuk kishte sistem për shuarjen e zjarrit

Pronarët e barit zviceran ku humbën jetën 40 persona dhe u plagosën 116 të tjerë, Zhak dhe Xhesika Moreti, kanë pranuar se objekti nuk kishte sistem spërkatës kundër zjarrit dhe se punonjësit nuk ishin të trajnuar për veprim në rast zjarri. Pas marrjes së parë në pyetje, në opinion po dalin detaje të reja.

Zjarri është shkaktuar nga fishekzjarrë, daljet e emergjencës kanë qenë të bllokuara, ndërsa mes të lënduarve ka pasur edhe të mitur. Sipas televizionit BFMTV, dy pronarët, në seanca të ndara hetimore, kanë dhënë dëshmi të detajuara për ngjarjet e asaj nate fatale.

Sipas deklarimeve të Xhesikës dhe Zhak Moretit, mbrëmja në klubin “Le Constellation” kishte nisur qetë. Xhesika kishte mbërritur rreth orës 22:30, ndërsa Zhaku ndodhej në një lokal tjetër në pronësi të tyre – barin “Senso”.
– Në mesnatë kishte shumë pak njerëz. Më vonë klubi u mbush dhe në një moment kishte rreth 100 mysafirë – ka deklaruar Xhesika.
Zjarri shpërtheu kur kamerierët mbanin mbi supe shishe me fishekzjarrë të ndezur drejt tavolinave.

– Papritur ndjeva shqetësim në turmë. Pashë një dritë portokalli në një cep të barit. Menjëherë bërtita: “Të gjithë jashtë!” dhe thirra zjarrfikësit – ka rrëfyer Xhesika Moreti.
Zhak Moreti, i cili në atë moment ndodhej në barin “Senso”, rreth orës 1:28 ka marrë një telefonatë paniku nga bashkëshortja e tij:
– I thashë: “Po digjet, eja menjëherë!” Biseda zgjati njëmbëdhjetë sekonda.
Kur mbërriti në vendngjarje, klubi ishte tashmë i mbushur me tym. Hyrja kryesore ishte e pakalueshme, ndërsa dera e pasme ishte e mbyllur nga brenda. Së bashku me edhe dy persona të tjerë, ai rrethoi ndërtesën dhe arriti ta hapë derën.
– Kur u hap dera, shumë njerëz qëndronin të shtrirë pa ndjenja në dysheme – ka deklaruar ai.

Hetimi u fokusua shpejt në masat e sigurisë në klub. Sipas BFMTV, pronarët kanë deklaruar se lokalin e kishin marrë në vitin 2015 dhe e kishin rinovuar plotësisht. Instalimet elektrike dhe ventilimin i kishin realizuar kompani të jashtme.
Klubi kishte një dalje kryesore dhe një dalje emergjence, të cilat, sipas Zhak Moretit, ishin të shënuara siç duhet. Fotografitë që ka siguruar BFMTV i konfirmojnë këto pretendime.
Fishekzjarrët që shkaktuan zjarrin, sipas tyre, përdoreshin zakonisht në festa ditëlindjesh.

Ndërkohë, ndaj Xhesikës dhe Zhak Moretit është ngritur aktakuzë për vrasje nga pakujdesia, shkaktim të paqëllimshëm të zjarrit dhe shkaktim të lëndimeve trupore.