Fëmija i parë për këtë vit në Kumanovë, është djalë

Foshnja e parë në Kumanovë është mashkull. Edhe nëna Egzona (31) edhe foshnja janë në gjendje të mirë shëndetësore. Bëhet fjalë për fëmijën e dytë në familjen Rexhepi, i lindur me lindje spontane dhe me peshë lindjeje 3.300 gramë. Kryetari i Komunës së Kumanovës, Maksim Dimitrievski, së bashku me ekipin menaxhues të spitalit, sot vizituan nënën dhe i dërguan dhurata simbolike.

Dimitrievski i uroi familjes dhe personelit mjekësor, duke theksuar se lindja e një jete të re është mesazhi më i fuqishëm për të ardhmen.

“Uroj para së gjithash shëndet dhe lumturi për të porsalindurin, për nënën dhe për gjithë familjen. Pres që viti 2026 të jetë i begatë, pjellor dhe i mbushur me zhurmë fëmijësh, mendime pozitive dhe buzëqeshje. Dua t’i falënderoj mjekët kujdestarë dhe gjithë personelin mjekësor-teknik për profesionalizmin e tyre, si dhe ekipin menaxhues të Spitalit të Përgjithshëm të Kumanovës, i cili vazhdimisht po përmirëson kushtet e punës,” deklaroi Dimitrievski.

Ai uroi që të ketë sa më pak pacientë në repartet e tjera spitalore dhe shumë më tepër në repartin e Gjinekologjisë dhe Obstetrikës. Gjinekologia Naile Osmani informoi se kjo është foshnja e parë e lindur në Kumanovë në vitin 2026. Më 31 dhjetor kanë lindur dy foshnja, ndërsa edhe sot pritet lindja e dy të tjerave.

“Numri i të porsalindurve po zvogëlohet, por ky nuk është problem vetëm i Kumanovës. Është një trend në të gjithë Maqedoninë, si dhe në rajon e në Ballkan. Vitin e kaluar në Kumanovë lindën gjithsej 376 foshnja, dhe në 99 për qind të rasteve si nënat ashtu edhe të porsalindurit ishin në gjendje të mirë shëndetësore,” deklaroi Osmani.

Neonatologia dr. Aleksandra Hristova sqaroi se te foshnja është vërejtur një distres respirator i moderuar dhe se i është ofruar kujdesi i duhur shëndetësor.

“Foshnja ka lindur me vështirësi të moderuara në frymëmarrje, por pas vendosjes së terapisë përkatëse gjendja është stabilizuar. Ekipi pediatrik vazhdon me mbikëqyrje 24-orëshe dhe presim që në një afat sa më të shkurtër foshnja të dërgohet në shtëpi në gjendje të mirë shëndetësore,” theksoi Hristova.

Ajo nënvizoi se ndërhyrje të tilla janë praktikë standarde dhe pjesë e kujdesit të përditshëm neonatologjik, me qëllim që qëndrimi në maternitet të jetë sa më i shkurtër dhe sa më i sigurt.

Drejtori i Spitalit të Përgjithshëm të Kumanovës, Sasho Stoshevski, paralajmëroi hapa konkretë për përmirësimin e kushteve në repartin e Gjinekologjisë dhe Obstetrikës. Këtë vit planifikohet rinovimi i repartit dhe formimi i apartamenteve për lehonat dhe të porsalindurit, me qëllim që pacientët të ndihen më rehat. Kapaciteti i spitalit është solid dhe ekipi është i gatshëm të përballojë një numër të shtuar lindjesh. Sa i përket mungesës së anesteziologëve, ai informoi se tashmë janë ndërmarrë masa.

“Është shpallur konkurs, një mjek i ri tashmë është punësuar dhe janë dhënë edhe specializime të reja. Presim që brenda një viti deri në një vit e gjysmë gjendja me anesteziologët të stabilizohet ndjeshëm,” deklaroi Stoshevski.

Në vitin 2024 në spitalin e Kumanovës janë regjistruar 688 lindje, çka paraqet një trend rënieje, pasi në vitin 2023 kishte 730 lindje. Spitali i Përgjithshëm i Kumanovës është materniteti i vetëm për rajonin verilindor.