Junta ushtarake thotë se është parandaluar një komplot për të vrarë udhëheqësin e Burkina Fasos

Një komplot për të vrarë udhëheqësin ushtarak të Burkina Fasos, Kapiten Ibrahim Traoré, është penguar, njoftoi kombi i Afrikës Perëndimore.

Plani i sofistikuar ishte hartuar nga Nënkoloneli Paul Henri Damiba, oficeri ushtarak i rrëzuar nga Traoré në shtator 2022, tha ministri i sigurisë në një transmetim të vonë të natës, ka raportuar BBC, transmeton Gazeta Express.

“Shërbimet tona të inteligjencës e kapën këtë operacion në orët e fundit. Ata kishin planifikuar të vrisnin kreun e shtetit dhe më pas të godisnin institucione të tjera kyçe, përfshirë personalitete civile”, tha Mahamadou Sana, duke pretenduar më tej se komploti ishte financuar nga Bregu i Fildishtë fqinj.

Nuk ka pasur asnjë koment as nga Koloneli Damiba dhe as nga Bregu i Fildishtë.

Që nga marrja e pushtetit, Kapiten Traoré është përballur me të paktën dy përpjekje për grusht shteti dhe po përballet gjithashtu me dhunën në rritje xhihadiste që ka detyruar miliona njerëz të largohen nga shtëpitë e tyre.

Pavarësisht këtyre sfidave dhe reputacionit të tij autoritar, udhëheqësi ushtarak 37-vjeçar ruan mbështetje të fortë popullore dhe ka fituar një numër të madh ndjekësish në të gjithë kontinentin për vizionin e tij pan-afrikanist dhe kritikat ndaj ndikimit perëndimor.