Kallëzime penale, arrestime dhe aksidente trafiku në mbarë vendin

Gjatë ditës së djeshme dhe orëve të fundit, Ministria e Punëve të Brendshme ka regjistruar një sërë rastesh penale, arrestimesh dhe aksidentesh trafiku në disa qytete të vendit informon Tetovasot.

SPB Veles ngriti kallëzim penal kundër T.S. (43) nga Kavadari për prodhim dhe shpërndarje të paautorizuar të drogave narkotike, pasi gjatë bastisjes në shtëpinë e tij u gjetën dhe u sekuestruan marihuanë dhe kokainë.

Në rajonin e Strugës, u ngrit kallëzim penal kundër një 18-vjeçari nga Ohri dhe një të mituri 16-vjeçar nga fshati Mesheishtë për rrezikim të sigurisë, pasi tentuan të godasin policinë me automjet gjatë tentativës për t’u larguar pa u ndalur në shenjë.

SPB Tetovë paraqiti kallëzim penal kundër një 35-vjeçari nga Tetova për rrezikim të sigurisë, i cili ka kërcënuar nënën e tij dhe ka dëmtuar orenditë në shtëpinë familjare.

Në Shkup, tre persona u privuan nga liria për posedim të marihuanës, ndërsa një 42-vjeçar nga Kavadari u arrestua pasi ishte në arrati nga Burgu i Gjevgjelisë.

Një tjetër kallëzim penal për drogë u ngrit në Strugë kundër një 44-vjeçari nga fshati Oktisi, ndërsa në Kumanovë një 40-vjeçar u procedua penalisht për prodhim dhe furnizim të mjeteve të destinuara për kryerje të veprave penale, pasi në automjetin e tij u gjetën mjete për hapjen e bravave.

Në Vinicë, u ngrit kallëzim penal kundër një 41-vjeçari nga Strumica për rrezikim sigurie dhe ngacmim seksual ndaj dy femrave përmes rrjeteve sociale.

Janë regjistruar edhe disa incidente të rënda në komunikacion. Në Prilep, një 60-vjeçar pësoi lëndime të rënda pasi u godit nga një moped, ndërsa në Shkup një këmbësor 57-vjeçar u godit nga një automjet i drejtuar nga një i mitur.

Në kryeqytet janë regjistruar edhe përleshje fizike, dhunë në familje, sulm ndaj shoferit të autobusit dhe një rast mashtrimi financiar në vlerë prej 95.400 denarësh.

Policia njofton se për të gjitha rastet po ndërmerren masa për zbardhje të plotë dhe do të vijojnë parashtresat përkatëse.TS