Lambert: KE është e përkushtuar ndaj problemit të operatorëve të transportit dhe po punon për zgjidhjen e tij

Komisioni Evropian është i vetëdijshëm për shqetësimet që shprehin operatorët e transportit nga Ballkani Perëndimor, po e ndjek me kujdes situatën me bllokadat në pikat kufitare dhe është në kontakt me partnerët nga rajoni, deklaroi sot zëdhënësi i KE-së për çështje të brendshme, Markus Lambert.

Deklarata e Lambertit vjen si përgjigje ndaj një pyetjeje gazetareske për qëndrimin e KE-së lidhur me bllokadat e pikave kufitare drejt zonës Shengen nga transportuesit ballkanikë dhe akuzat e tyre se sistemi EES i diskriminon ata në krahasim me kolegët e tyre nga BE-ja. Lambert u pyet gjithashtu nëse Unioni planifikon t’u japë shoferëve profesionistë një status të veçantë dhe të mos i trajtojë ata si turistë gjatë hyrjes në bllok.

“Jemi të vetëdijshëm se një numër i madh profesionistësh nga vendet e treta mund të kenë nevojë të qëndrojnë në zonën Shengen më shumë se 90 ditë brenda një periudhe 180-ditore. Këtu përfshihen profesionet me mobilitet të lartë, siç janë shoferët e kamionëve, por edhe sportistët dhe artistët. Kjo çështje lidhet gjithashtu me rregullat kombëtare dhe marrëveshjet ekzistuese bilaterale. Është një çështje ndaj së cilës jemi plotësisht të përkushtuar dhe për të cilën po punojmë dhe po reflektojmë në kuadër të përgatitjeve për strategjinë e ardhshme të vizave, të cilën do ta publikojmë këtë javë”, deklaroi Lambert.