Netanyahu: S’ka rindërtim të Gazës pa çarmatosjen e Hamasit

Kryeministri izraelit, Benjamin Netanyahu, ka këmbëngulur të martën se rindërtimi i Rripit të Gazës nuk do të ndodhë para se lëvizja militante Hamas të çarmatosej dhe tunelet e saj të mbetura të shkatërroheshin.

Gjatë një konference për shtyp një ditë pas gjetjes së mbetjeve të pengut të fundit të mbetur në Gazë, ai gjithashtu ka mohuar sugjerimet se do të lejonte krijimin e një shteti palestinez në Gazë, duke thënë: “Kjo nuk ndodhi dhe nuk do të ndodhë”.

Kryeministri ka përsëritur gjithashtu qëndrimin e tij se ushtarët turq dhe katarianë nuk duhet të jenë pjesë e asnjë force ndërkombëtare sigurie në Gazë.

Gjatë konferencës për shtyp, Netanyahu ka thënë gjithashtu se Izraeli do të menaxhonte pikën kufitare Rafah midis Gazës dhe Egjiptit

Izraeli kishte thënë se Rafahu fillimisht do të hapej vetëm për njerëzit, jo për mallrat, të cilët vazhdojnë të hyjnë në Gazë përmes kalimeve nga Izraeli.

Por ka ofruar pak detaje rreth asaj se kush mund të jetë i kualifikuar për të kaluar. Gjithashtu mbetet e paqartë se kur ndihma nga Egjipti do të lejohet të hyjë në enklavën palestineze.

Netanyahu gjithashtu ka lëshuar një paralajmërim tjetër për Teheranin, duke thënë se qeveria e tij do të përgjigjej “me një forcë që Irani nuk e ka parë ende” nëse vendos të sulmojë Izraelin.