Putin: Po e ndjek nga afër situatën në Iran

Presidenti rus Vladimir Putin i tha të enjten Presidentit të Emirateve të Bashkuara Arabe, Mohammed bin Zayed al-Nahyan, se Rusia po e monitoron nga afër situatën në Iran dhe dëshiron ta diskutojë atë me të gjatë bisedimeve në Kremlin, raportoi Reuters .

Putin e bëri deklaratën në fillim të një takimi me presidentin e Emirateve të Bashkuara Arabe, vendi i të cilit kohët e fundit priti bisedimet e paqes midis Rusisë dhe Ukrainës.

Më herët gjatë ditës, zëdhënësi i Kremlinit, Dmitry Peskov, tha se mundësia e bisedimeve midis Shteteve të Bashkuara dhe Iranit nuk ishte shteruar ende dhe se çdo përdorim force kundër Teheranit mund të krijonte “kaos” në rajon dhe të çonte në pasoja të rrezikshme.

Peskov e bëri deklaratën një ditë pasi Presidenti i SHBA-së, Donald Trump, i bëri thirrje Iranit të ulet në tryezën e negociatave dhe të arrijë një marrëveshje për armët bërthamore ose të përballet me një sulm të mundshëm të SHBA-së.